Iosua.13
[Vaega Lua]
A tatou talanoa i tala tuu ma tala faavae o Samoa mai anamua i ona faasinomaga ma ona eleele, ua laulauvivilu ai le atunuu e oo lava i tamaiti. O tofi ga a Pili ua manino. Mai le faatausiusiuga i Sasa’e o eleele o Upolu se’ia oo i le faatausiusiuga i Sisifo, ma Manono ma Apolima, ua maioio lelei. O loo aoaoina ai alo ma tama fanau uma a Samoa i ona faleaoga uma, i tala faasolopito ma talaaga mai anamua o tagata, o aiga, o eleele ma fanua. O eleele e galuea’ina ai le tausiga o ona tagata(Ātua). O eleele e tautala mo le manuia o ona tagata(Saga). O eleele e tau malo mo le malu o ona tagata(Aana); ma eleele e tapuaia ai faiva o tau-usoga (Tolufale).
O le itū atoa i Sasa’e o le Ioritana ua faamatuu e Mose i ituaiga o Kato ma Reupena ma se vaega o Manase, mo faatoaga lafu manu.(Numera.32:1-4,33). Ona agai atu ai lea i le laueleele atoa o Kanana. Ua vaevaeina le laueleele atoa i le fanau a Iakopo. O le tofi, e tusa ma o latou aiga.
O tofi ga ia a Iosua e tusa ma le faatonuga a le Atua. Manatua ua 450 tausaga talu ona tuua e le fanau a Aperaamo eleele nei. Lea ua foi mai le fanau a Aperaamo e silia ma le tolu miliona tagata, o ē e le i vāai lava i le eleele na foaiina e le Atua i lo latou tamā o Aperaamo; vaganā Iosua le atalii o Nuno, ma “O le tofi e tusa ma o latou aiga.”
Kalepo le atalii o Iefune sa iai i le asiasiga i Kanana(Numera.14:30) Samoa, e faitau fi a augātupulaga ua mavae atu o Isaraelu latou te le i iloa le ogālalolagi o iai lo latou tofi . Ae na aumai lava e Ieova le Atua o ō latou tamā, tuu sa’o i eleele sa folafolaina, o lo latou tofi lea. Aisea? O suli. O suli o le eleele. E le tasi pe lua ni mālo sa fai mo latou, eleele nei i le taimi umi sa koleni ai e Farao le nuu o le Atua. Peitai, e foi mai lava tagata o le eleele, e nanamu i suli o le eleele. Poo oe o se Lufi lufi poo se Lepā poo se Salani, e iloa lava oe o le Ātua. Poo fea lava foi o le lalolagi nei e feosofa’i ai le Faleasiu poo le Nofoalii poo le Satapuala, e le aveesea lou nanamu o oe o le Āana. O tatou ua uma ona tofi . O le tofi e tusa ma lona ituaiga. Pe fai mai lava le taitai o Iran e titina ese Isaraelu mai le faafanua o le lalolagi, e tumau lava le tofi , e tusa ma lona ituaiga. O upu e masani ai outou matai ma outou le au fai upu, “E leai sē taumāsina ma le Atua!” O le ā le uiga o lea upu ia te oe?
O lea ua vaevae eleele ma o latou tuāoi. O nisi e tetele eleele a o nisi e laiti. Peitai sa vaai i eleele, e tusa ma o latou aiga o ituaiga e sefulu ma le lua. E tāūa tele i ituaiga taitasi o latou eleele ma fanua. Auā o le tofi faaauau o fanau ma augā fanau. E le feāiāa’i tofi . Ua uma ona faataoto tuāoi eleele o ituaiga uma e sefulu ma le lua. O le tulafono a le Atua, “’Aua e te sii le tuāoi o lē lua te tuāoi, o le tuāoi sa faia e ou tua’ā i lou fanua, o le a fai mou tofi i le nuu e foaiina e Ieova le Atua ia te oe, e fai mou tofi” (Teuterenome.19:14). Silasila oe Samoa, e muamua fofola mai tulafono o eleele e le i oo atu le nuu i eleele ua folafolaina!
Ae silasila ane i si o tatou atunuu e le atoa se kuata miliona o ona tagata. Lea ua tapisa! Ua faamisamisa! Ua galo le lē taumāsina ma le Atua! Ua tatou lu’i le pule faasoa a le Atua i le tofi e tusa ma o latou aiga! Ae a outou saunoa, ua outou faamāsiisii le pule a le Atua – O le ti’a e le seūa! O le mua e lē fuatia! O le tao e velo i le maninoa! O le maa e togi faa-to! Ma le ta e le agaia! O fea? A o ai la ua na fuatia le mua a le Atua pe afai o le tōfā lea? O ai le toa ua na seu le ti’a a le Atua? Ae fai atu ea le mea na faia i le na faia e faapea ma faapea e pei o la le aposetolo? Samoa ma lo tatou mālo, ’aua nei faapea. O Kato ma Reupena ma se isi vaega o Manase sa faaolooloma’au.(Numera.32:5).
E ui lava e le i oo i le taimi e to pule ai eleele, ae sa su’e mālo i lalo. O aga na a Samoa. Auā e lē mala ese iinā mala ese iinei! E pei o le tōfā a le ao o lo tatou mālo, “O Samoa e le o se mālo; o Samoa o le uso; o le aiga.” E faamaoni le sa’o o lenei tōfā. O le tofi poo eleele o le atunuu, o measina a uso. O le tofi e tusa ma o latou aiga. O le lagisoifua? E le i lavea le mālo i tofi ga a Pili!
E sa’o? E le i iai foi se vaega mo le lotu i tofi ga a Pili! E sa’o? Ae faapefea le faasoa a Mose ma Iosua? E le i iai se vaega eleele na faavagavaga mo se faiga malo a Isaraelu! E le faatagaina foi e le Atua se eleele mo Sa Levī!(Teut.18:2; Num.18:20) Aisea? O measina a tagatanuu. O tofi o aiga. Samoa e, e tatau ona tatou iloa lelei tausi mea uma ua ia te i tatou mai ia Ieova lo tatou Atua. Ala mai ia Samoa! Vaai i au measina.
Tausi mamalu i ou tofi . Fai mai Iesu, “ave mea a le Atua i le Atua” Tatou te auauna i le Atua i lo tatou tofi . Tatou te vivii i le Atua i lo tatou faasinomaga. E le taūa le tele poo le itiiti o lou tofi . A o lona faaaogaina tatau, e tusa ma o outou aiga. ’Aua tatou te faamata’uina o tatou uso i o latou tofi , o le mea patino a latou lava mai le Atua, “Ae taitasi ma nofo i lalo o lona vine, ma lalo o lona mati; e leai foi se na te faamata’u mai, auā ua faapea ona tulei mai ai le siufofoga o Ieova o ’au.” (Mika.4:4)
Fai mai le poto o Solomona, “’Aua ne i sii le tuāoi mai le vavau, na faia e ou matua”(Faataoto.22:28) “’Aua ne i sii le tuāoi mai le vavau; ’aua foi ne i e uia fanua o mātuaoti.” (Faataoto.23:10) O tapu la ia o tofi o le nuu o le Atua ma ona tuāoi.
Samoa e, e te tausi mavaega. O tatou o tausi mea a le Atua i faasinomaga taitasi ua fai ma o tatou tofi . O le fesili – O malu ia te oe eleele o le itumālo? O ’e puipui i le tofi o le nuu? O saogalemu ia te oe measina a le aiga? A silasila i le lesoni poo le mataupu atoa lenei(13), o le vaevaeina o eleele ma ona tuāoi. O loo auiliili manino mai ai lava aai ma faoā aai ma tuāoi eleele o tofi taitasi e tusa ma o latou aiga. O faailoga matamata tetele na o le mā’elegāina e le Atua o lana pule to. E paia lona vaevaeina o eleele. E mamana lava faasoa. Auā sa pule mautinoa, o eleele tumau. O le tofi , e tusa ma o latou aiga. A o oe, pe faapefea ona e tali atu i le Atua Silisili Ese i le tofi ua ia aumai e fai mou faasinomaga? Lo’u atunuu e, ’aua ne i galo, “O eleele, o le tofi mai le Atua, e tusa ma o tatou itumalo, nuu, ma aiga.”
Amene
+685 7737063 / 7783782