Amata iloiloga o le mataupu a Fonotoe ma Muagututagata

O le aso ananafi lea na amata iloilo ai i luma o le Fa’amasinoga Fa’aitumalo le mataupu o lo’o molia ai le Sui Palemia Fonotoe Nuafesili Pierre Lauofo ma le Minisita Lagolago Muagututagata Peter Ah Him.

O le aso ananafi lea na amata iloilo ai i luma o le Fa’amasinoga Fa’aitumalo le mataupu o lo’o molia ai le Sui Palemia Fonotoe Nuafesili Pierre Lauofo ma le Minisita Lagolago Muagututagata Peter Ah Him.

O lo’o tetee ia sui o le palemene i moliaga e fa’asaga ia la’ua e mafua mai i se fa’alavelave lea na tula’i i le po o le aso 4 Oketopa 2013.

E tasi le moliaga o le tau fa’aoso’oso e fa’atino se solitulafono fa’asaga i le Sui Palemia, ae lua moliaga fa’asaga ia Muagututagata o le fa’alavelave i tiute a leoleo ma le liliu fa’asolitulafono o lana ta’avale i luma o le NPF Plaza.

O lenei mataupu o lo’o fofoga i luma o le Afioga i le Fa’amasino, Vaepule Alo Vaemoa Vaai.

O le tama’ita’i Loia o Rexona Titi ma Brigitta Lo Tam Fa’afiti mai i le Ofisa a le Loia Sili o lo’o tulai mo le itu a leoleo, ae o le alii loia o Patrick Fepulea’i o lo’o tula’i mo le Minisita Lagolago ia Muagututagata o Donald Kerslake o lo’o tulai mo Fonotoe.

O le molimau muamua o lenei mataupu o le alii leoleo o Toa Tafunai o ia lea sa tapueina ata o le nofoaga lea na tula’i mai ai le fa’alavelave. O le lona lua o molimau o le alii Leoleo sinia o Leuluaialii Ma’anaima Patu, Moataa , Vaiala ma Sapunaoa Falealili.

Ua 12 tausaga o lana auaunaga i le Matagaluega o Leoleo, ma o lo’o galue nei i le vaega o Ta’avale Afi. Na ia fa’aalia i lana molimau o le po o le aso 4 Oketopa 2013 sa fa’atino ai poloka a leoleo i e o loo feoai faasolitulafono i luga o le auala tele ae le gata i lea o latou o lo’o faapea ona tagofia le ava malosi ma feoai i ta’avale.

O le poloka sa i Vaimoso sa tiute ai ae o le louloua o le tau na mafua ai ona fa’auma le poloka ae toe foi i le Ofisa autu i Apia ona ua le saogalemu mo le fa’atinoina o tiute i lea afiafi. Ina ua taunu’u i le Ofisa sa toe tofia ai o ia ma nisi o leoleo e to’afa e fa’aauauina le petolo i lea po i le talafatai o Apia.

O latou ia sa tiute , o le alii Taai lua o Mose Lotomau sa ta’ita’ia le latou petolo, le alii leoleo o Tevita Vii, Michael Vala, o Ioapo Isitolo ma Ma’anaima. Na fa’atonuina latou e le alii Ta’ita’i, o le Leoleo Asiasi o Keti Toleafoa e fa’ataunuuina le le tiute i lea po.

Sa ia ta’ua o le latalata i le 10 i le po na fa’atino ai le latou petolo i le auala autu a le malo e amata mai Vasigano, seia paia le fa’ata’amilosaga i le Tanoa Tusitala. Na muamua lava agai le latou ta’avale i Mulinuu, toe ta’amilo atu ai ma toe liliu agai i le Uati.

Ina ua pasi laititi ia moli fa’asinoala lea e i luma o le Asco Motors po’o luma o le flea maketi i Savalalo.

“ Na ou vaaia ai loa se ta’avale ua agai mai i luma o le NPF Plaza, ituaiga o le Toyota Hilux NUMERA .MCIL-07 o lo’o agai mai i itu lea e iai le RSA fa’asaga mai i Sogi” o Ma’anaima lea.

Na sau lea ta’avale ma liliu tonu i luma o le NPF Plaza ma toe fa’asaga le afi agai i le Uati. Sa fa’atuina le ta’avale ma fa’atinoina ia siaki masani a leoleo, pe tusa lea o le 10:30.

Na fa’aee atu ai le pu a le latou ta’avale ina ia afe i tua le ta’avale ma le auala. Sa tu tonu le taavale i le Faletupe o Atinae, sa agai loa iai alii leoleo e to’alua mo le faia o siaki.

O laua nei o Ioapo Isitolo ma Tevita Vii sa fa’atinoina le siaki o le ave taavale. Na ia molimauina sa fesili i le laisene o le ave ta’avale ma faia foi lana masini lea e siaki ai le manava a tagata pe sa tagofia le ava malosi.

O lenei ta’avale lenei sa tu i luma o le pikiapu a leoleo. Na fa’amaonia e le molimau na te lei lagonaina ia tala a leoleo ma Muagututagata na faia ae nao gaioiga sa fa’atino.

Sa ia iloa atu ia Ioapo o taumafai e faia lana masini. Na ioeina e Ma’anaima sa ia iloa lelei lava le alii Sui Minisita Lagolago ia Muagututagata Peter Ah Him i le taimi na fa’atu ai e leoleo lana ta’avale ma faia lana siaki.

E fa’alua lava ona faia masini a Muagutu e lei lelei ona feulaina. Ao feulaina le masini a Muagututagata o le taimi lea na ia vaaia ai le ta’avale Toyota Hilux lanu moana SSS-OI ua pasi laititi mai patupatu o lo’o luma o le RSA.

“ Na pasia le matou ta’avale ma ou iloa ai o le Afioga i le Sui Palemia o lo’o fa’afoeina mai le ta’avale lea”. o le molimau lea.

“ E lei umi se taimi ae toe liliu atu le taavale lea ma fa’atafa i autafa tonu o le ta’avale lea e faia ai galuega a leoleo, na tu le taavale a le Sui Palemia, na ou iloa lava le mea e tupu” o Ma’anaima lea.

“ Na ou oso i fafo ma le matou ta’avale ae ou agai sao atu i le mea lea e tu mai ai le ta’avale a le Sui Palemia”. o se isi lea o ana molimau.

E fetaui lona taunuu atu ae fai mai loa ia Fonotoe i alii leoleo ia e faia le sailia o Muagututagata, po’o le a le latou mea o fai. O le taimi lea ua le toe faia se galuega, ua tutu uma ia tama ae fa’asasaga mai i le ta’avale a Fonotoe.

“ Sa ou tali atu iai e malie lau Afioga o lo’o fa’tino le galuega a leoleo o lo’o saili le tino a le aveta’avale pe sa tagofia se ava malosi”.

O le taimi lea na sauoa mai ai Fonotoe, e o muamua i le fale kalapu a le Leon i luga o le NPF Plaza e aumai ia le Afioga i le Sui Komesina sa latou inu fa’atasi ai o Talaiamanu Keti. Na fesiligia e Rexona ia le molimau pe na te manatua ia upu a le Sui Palemia na fai atu ia latou.

Na tali Ma’anaima , o lea lava. “ Afai o le amiokogu ga kou ke sa’ilia oga kou agai lea i luga o le NPF Plaza i le pa a le Liona e aumai le Sui Komesina o Talaimanu Keti lea sa matou inu fa’atasi ai e aumai e molia” o upu ia a le Sui Palemia na fai atu ia latou. Na tali atu iai e fa’apea“

Sa ou tali atu iai e malie e le’o sau se Talaimanu i sana ta’avale o le e inu i luga o le pa” . O le taimi lea na toe fa’asaga mai Fonotoe ma saunoa mai e tuu loa le matou mea la e fai.

“ Sa valaau mai ia matou, tuu loa le matou mea la e fai, ma valaau mai ia Muagutu e alu lana ta’avale.” o le molimau lea.

E fa’atolu lava ona valaau ia Fonotoe ia Muagututagata e alu lana ta’avale, ma alu ese loa ma le taavale a Muagutu ae folo atu ai Fonotoe. Na fesiligia e Rexona le molimau poo le a sana vaai i foliga o le Sui Palemia i le taimi na fai atu ai ai ana tala ia latou.

“ Na ou maitauina ia foliga ita ma foliga le fiafia o Fonotoe e ala i ona foliga vaai”.o le tali lea a le molimau.

Ina ua tulai ia le alii Loia o Patrick ma fesiligia le molimau a Ma’anaima pe sao na te leiloa atu le taimi na fa’atino ai e Ioapo i le fa’atinoina o le siaki a Muagututagata. Ae sa tali le alii leoleo sinia, sa ia iloa lelei atu lava.

Ina ua tulai le alii Loia a Fonotoe le susuga ia Donald Kerslake ma fesiligia le molimau , o lea sa ia taua i lana fa’amatalaga i le taimi na fa’atinoina ai le sailiga o Muagututagata sa ia iloa lelei lava. Na tali ia le alii leoleo o lea lava.

“ A fa’apea e te nofo i totonu o le tou taavale i le pito i luma i le itu taumatau o lo’o fa’atino ai le galuega e fa’afefea ona e iloa atu ia le galuega a Ioapo la e fai, e fa’afefea la pe a ou fai atu e te leiloa mai?.

Na tali le alii leoleo, o le afa o le ta’avale a Muagututagata le a tu ai le latou ta’avale o loo kilia lelei lana vaai i le mea o lo’o fa’atinoina e tusa foi pe tu i tua o lo’o kilia lelei lana vaai. Na saunoa foi ia le alii leoleo o lo’o ola moli o le auala i lea taimi.

Na tulituliloa pea e le alii Loia le molimau e sao na te leiloa galuega a Ioapo ma le isi leoleo sa faia. Na mautu lava le tali a Ma’anaima sa manino lelei lana vaai. Na fesiligia foi e le Loia le molimau o lea sa fa’alogo o fai le fesili a Fonotoe poo a latou mea sa fai. O lana molimau foi o ia lea sa tali ia Fonotoe, ae sao na te le lagona le fesili a Fonotoe?

O le fesili lea a le loia. Na tali Ma’anaima sa ia lagona lelei lava, ona e fetaui lona taunuu atu i le vaega sa tu ai le ta’avale, ae fesili loa ia Fonotoe i leoleo. Na toe fesiligia foi e le Loia le molimau e sao o Ioapo sa tali ia Fonotoe ae le’o ia.

Na tali ia le alii leoleo, o ia sa tali ia Fonotoe, afai sa tali foi ia Ioapo sa tali foi o ia. Na fesiligia foi e le loia ia le molimau a Ma’anaima, e sao o le fa’amatalaga a Ioapo o ia sa tali. Sa tali le alii leoleo, “ o le fa’amatalag a a’u lea e te fesili mai ai, ae le’o se fa’amatalaga a Ioapo, ta’atia la le fa’amatalaga a Ioapo ae o la’u fa’amatalaga moni lea” o le alii leoleo lea.

Na toe fesili le Loia e sao pe a fai atu ia te ia, na tu loa le ta’avale a Fonotoe fai loa lana fesili, ae na te lei lagonaina. Na tali le alii leoleo, e fetuai lava lona tu i autafa o le ta’avale ae fesili loa ia Fonotoe, o ia lava sa tali iai.

Na fesiligia foi e le loia le molimau pe aisea na ia taua ai sa faia le fa’amatalaga a Fonotoe afai o le amiotonu ona o lea e saili muamua ia le Sui Komesina.

Na tali le alii Leoleo, i lona manatu fa’apea ,e tau mai loa le Sui Komesina ona taofi loa lea o latou galuega. “ Ae le sao pe a ou fai atu ia te oe ua alai ona fai le fa’amatalaga Fonotoe ona o au tala sa faia i lea po?.

O le loia lea “ E sese” o le tali lea a le alii leoleo. Na toe fesili le Loia e fa’apea “ Ae le sao ua fai ia tala a Fonotoe ona ua e savali solo ma fai au tala leotele, e fai le amiokogu, fai le amiokogu. E matua sese a ga tala.” O le leoleo lea. Sa ia fa’aalia na mafua ona faia lana tala ia Fonotoe, ona ua fai mai e o muamua e molia muamua mai le latou Sui Komesina. O lo’o fa’aauau pea molimau.