Gūgū ina ua uma se fono a ua leva le Po

O le tulaga lena na i ai sui o le vaega o loo pulea le malo o le Vaega Faa-Upufai e Puipuia Aia Tatau a Tagata (H.R.P.P.) ina ua mae’a se fono e ono ma le ‘afa itula a le faa-faletui lea na mae’a a ua leva le po.

O le tulaga lena na i ai sui o le vaega o loo pulea le malo o le Vaega Faa-Upufai e Puipuia Aia Tatau a Tagata (H.R.P.P.) ina ua mae’a se fono e ono ma le ‘afa itula a le faa-faletui lea na mae’a a ua leva le po.

O lea fono sa fai i le potu o le Kapeneta i le maota o le malo, ma o se fono sa auai sui usufono uma o le H.R.P.P.-se’ia vagana ai sui o loo malaga-ma na amata i le itulaga e 3 i le afiafi.

Na soso’o lea fono ma se fono faapitoa a le Kapeneta lea sa talo mo le aoauli i le itula e 12 i le aoauli.

O mataupu sa talanoaina a’o faagasolo ia fono e lua sa lē mafai ona mautinoa.

E o’o lava i le Palemia o Tuilaepa Sailele Malielegaoi, pe o soo se sui o le H.R.P.P., sa lē fia talanoa mai i tusitala o nusipepa anapo.

“ E lē mafai ona fai atu sa’u tala,” o le tali lea a le to’atele o i latou na fesiligia e le Samoa Obwserrver. Ae sa fai mai faa-ulaula se to’atasi o i latou: “Ou te lē mana’o e tuli a’u.”

Mulimuli ane, sa mulimuli ane ona faailoa mai e se sui o le Ofisa o le Palemia i tusitala o nusipepa sa faatalitali atu e faapea e o’o lava ia Tuilaepa e leai sana upu e fai atu e uiga i le fono.

“Atonu pe o taeao (o le asō lea)” o lana faaaliga lea. “Ae mo le po nei,o le a leai se pepa o faamatalaga.” I lalo i le mea o loo faatutū ai taavale, sa vave lava ona ta’ape sui o le patī.

O le toatele o i latou e tofu ma le taumafataga i o latou lima, mata ‘ata’ata ma tuua lea nofoaga.

O lea fono sa fai i totonu o se potu e tapunipuni faitoto’a.

O Tusitala o Nusipepa sa faatali atu i le potu malolo. Sa i ai foi ma sekulakī.

O le fono anapo na soso’o ma le tele o vaiaso o le lē fiafia sa aafia ai le pati o loo pulea le malo.

O le lua vaiaso talu ai, na folafola mai ai e le Faipule o Siumu o Tu’u’u’u Anasii Leota ana fuafuaga o le a faavae se pati fou ona o le lē fiafia i le Minisita o Tupe, Faumuina Tiatia Liuga.

E lē na o Tu’u’u le faipule na saunoa e uiga i le Minisita o Tupe. Na fesiligia faalaua’itele e le Minisita muamua o Tupe o Papalii Niko Lee Hang le amio a Faumuina.

I le tausaga talu ai, e 19 ni sui auai o le H.R.P.P.sa taumafai e aveese Faumuina e ala i le tusi na latou tusi ma auina atu i le Palemia o loo faaalia manino ai ni tuuaiga se 18 e faasaga i lea Minisita. Sa le manuia le taumafaiga.

O le masina talu ai na teena ai e le Palemia o Tuilaepa tuuaiga e faapea o loo i ai feteena’iga i totonu o lana vaega.

Na ia toe ta’ua e faapea ua uma ona fai e le H.RP.P. le tonu i le lumana’i o Faumuina. “O lenei mea e lē o se mea fou,” o lana faaaliga lea.

“Ua uma ona matou fono e uiga i lenei mataupu.” I le faagasologa o le fono o loo fesiligia, lea na usuia i le tausaga talu ai, fai mai Tuilaepa, e “na o le to’atolu na palota ese, e mana’o ia faamavae o ia.

O isi tagata uma sa manana’o ia faaauau pea o ia ma o le tulaga lena o loo i ai.” Sa musu Tuilaepa e faailoa mai igoa.

“E leai se mea leaga (i totonu o la matou patī), o le faaaliga lea a Tuilaepa. “Sa fai la matou patī i le vaiaso talu ai ma sa i ai tagata uma se’ia vagana ai i la’ua e to’alua o loo lē malilie pea.

E leai ni o latou fatu e faamagalo ai.” Ina ua fesiligia poo ai ia sui usufono e to’alua, fai mai a ia: “Ou te le ta’u atua ia te outou poo ai latou ia.”

O le mea lea, faamata o mana’o o ia e fai se faaiuga ia i latou ina ia faamuta ai tuuaiga e faapea ua mavaevae le H.R.P.P.?

“Leai,” o le faaaliga lea a Tuilaepa. “Ua outou iloa o le faa-Kerisiano e faasino i le alofa ma le loto faamagalo.”

Ina ua taliu mai Niu Ioka i le amataga o le vaiaso, ua i ai le faamoemoe o le asō o le a talanoa mai ai le Palemia i tusitala o nusipepa.