Mo’omia e matua se fesoasoani

Ua matua mo’omia e le ulugali’i mai Lotopa o Sio Seu – 38 tausaga o le soifua ma si ona to’alua o Penelope Taufao e 32 tausaga o Luatuanu’u, se fesoasoani mo le la pepe-onomasina, o Macristmas Sio.

O Macristmas, na ola mai e afaina lona fatu (Cyanortic Heart Disease).

Ua fa’amaonia ma talia le ‘auina atu o le pepe mo ta’otoga-mo’omia ae talu ai o fa’afitauli tauseleni o feagai ma sia aiga, ua le mafai ai ona malaga atu o ia i le taimi nei mo ta’otoga i Niu Sila.

I se tusi na tu’uina mai i le Foma’i o Fiona Hunt, na fa’ailoa ai e fa’apea, sa va’aia le pepe o Macristmas e le Foma’i Fa’apitoa o Dr. Nigel Wilson o lo’o asiasi mai i Samoa, ma o lo’o una’ia le ‘aiga ina ia vave ‘avatu le pepe mo ni ta’otoga a’o le’i tuai tele.

Ua le-iloa e le ulugali’i po’o fea a sulu iai mo se fesoasoani. Sa sa’ili’ili i le Vaega o le To’omaga i se fesoasoani mo pemita ma pasese i Niu Sila mo ta’otoga o le pepe.

O Sio o se aveta’avale mo ta’avale la’upasese laiti i le Fale-Ta’avale e Fili ae le taitai ‘a’u’a’u le fa’asoa mo lea fa’amoemoe ona e le faigaluega fo’i lona to’alua o Penelope.

E masani ona nonofo le aiga lea i Luatuanu’u i le aiga o le tina o Penelope peita’i e le’i leva ona fa’ase’e mai i le aiga o Sio i Lotopa, e latalata i le falema’i mo siaki faiso’o a le pepe. Na fa’ailoa e Dr. Fiona Hunt i matua o le pepe, e tatau ona taunu’u Macristmas i Niu Sila i le fa’ai’uga o le masina nei mo ta’otoga fa’apitoa o lona fatu. Ua pasia ma fa’amaonia e le Kapeneta le ‘auina atu o le pepe o Macritmas mo ta’otoga fa’apitoa i Niu Sila ae o lo’o talosagaina e Lio ma Penelope se fesoasoani mo totogi o pemita ma pasese ina ia mafai ai ona ‘auina atu o Macristmas mo ta’otoga mo’omia.

Mo le mamalu o le atunu’u e fia fesoasoani i sia aiga mo le fa’asaoina o le ola o fanau, fa’amolemole vili sa’o le ‘Ofisa o le To’omaga mo e Puapuagatia i le telefoni numera 25392 po’o le 27904. Fa’afetai Agalelei!