Pa’u Samoa i le fa’ai’uga o le Ipu a le Pasefika

Na le manuia le Manu Samoa i lana ta’aloga mulimuli mo le Ipu a le Pasefika, ma ua tu’u aloa’ia atu ai i a’a’o o Va’alele mai Fiti lea siamupini, ina ua faia’ina e 39 – 29 i Vancouver, Kanata ananafi.

I le mae’a ai o se ta’aloga le-matagofie i se matamata i le lua vaiaso talu ai – lea na tutusa ai e ta’i 30 ma Fiti, o le tele fo’i o mea sese ma le tuai o le amataga o le ta’aloga ananafi, na aupito tiga ai le maimoa a le atunu’u.

E le taumatea le matua fa’anoanoa o le faia’oga o Stephen Betham ma lana ‘Au atoa.

Na ta’ua e le ‘afa o Kahn Fotuali’i, o le tele o mea-sese ua mafua ai ona faia’ina.

“O se ta’aloga matua finau lava, a ole tulaga lava lena o mea nei o lakapi,” o lana fa’aaliga lea. “O mea sese i i ma o foi, ua sao mai ai Fiti.

E tele fo’i pu’e na misi ae maise le ta’a’alo a Fiti ananafiu, na foliga ai e mafai lava ona sikoa i so’o se vaega e osofa’i mai ai.”

O se finauga maoa’e i le Malae i Swangard Stadium na va’ai ai le motu’ese o Fiti i le amataga ma sili ai o latou ‘ai e 17 – 3 a’o le’i finau atu ma fa’atau-tino Samoa i le ‘afa lona lua, ma maua fa’atopetope ai sikoa e lua, ma sili ai e 21 -17.

A’o foliga mai ua fa’atamo’e e Samoa le ta’aloga, na toe finau mai fo’i Fiti, ma sikoa fa’atolu ai ma matua mamao ai ‘ai o le ta’aloga ma taofiofi ai lava ma i’u ina manumalo.

Manaia le amataga o le ta’a’alo a Fiti, na maua ai sikoa a le latou loka o Leone Nakarawa ma le ‘afa o Niko Matawalu.

Na toe amata fo’i e Nakarawa le sikoa mo le ‘Au a Fiti ina ua mae’a le 90sekone, ma motu sasa’o ai i lalo o pou-sikoa toe fa’aopoopo ma le isi lua i le a’a a Joshua Matavesi.

Na manuina le sala na a’a e Matavesi ma sili ai o Fiti e 10 – 0 a’o le’i tau’ai Samoa i le sala na a’a e Michael Stanley, mai se vaega mamao latalata i le laina e alu ai le polo i fafo.

Na toe sasi fo’i Samoa ina ua le maua le polo na tog ii totonu, maua ai e le Kapeteni o Akapusi Qera, tu’u loa ia Matawalu ma 100- mita ai tafatafa o pou mo le sikoa. Na manuia fo’i le a’a i le pou, tula’i mai ‘ai i le 17 -3.

Na finau mai le Manu Samoa, ma toe maua ai isi sala e lua na a’a e Stanley ma manuia uma, ma tumau ai ‘ai i le 17 – 9 i le afa muamua, ae le’i umi lava ona toe amata le ‘afa lona lua, ae fa’apalasi loa Jack Lam i le laina sikoa. E le’i umi fo’i, ae va’aia se momo’e mata’ina a le uigi-taumatau, le ali’i o Fa’atoina ‘Autagavaia ma suia ai ‘ai e 21 – 17.

Na tali mai Fiti, ina ua toe sikoa fo’i le ali’i o Nakarawa ma felata’i ai ‘ai e 22 – 21 a’o le’i faia se kiki-kolosi a Ben Volavola na matua fa’aletonu ai le puipui atu a le Manu Samoa.

Na toe to’a le Manu ina ua manuia fo’i le isi a’a a Michael Stanley ma toe sili ai fo’i le Manu, 24 – 22.

Na foliga mai ua fa’asolo vaivai le ‘Au a Fiti ona o le malolosi o le Manu i le toe finau atu, ae na toe suia atoa le tulaga o ‘ai ina ua toe fa’aopoopo fo’i isi sikoa e lua a Fiti a ua latalata ina mae’a le ta’aloga.

O le sikoa a le fulupeki o Kini Murimurivalu i le tulimanu, fa’atasi ma le a’a na manuia a Volavola, na sili Fiti e 29 – 24.

Na fa’atali lava Fiti se’ia fa’ailo le lelei i le ta’aloga i le fa’ai’uga, lea na motu ‘ese mai ai Peceli Yato mai le ogatotonu o le malae, tu’u atu loa ia Matavalu ma fa’asasa’o atu ai i le va o pou.