Fa’amanuiaina fanau-a’oga a Samoa i Fa’ailoga Fa’ava-o-malo

E to’alua talavou Samoa ua vala’aulia mai Niu Ioka e malaga atu mo le taua’aoina iai o fa’ailoga maualuluga ua manumalo ai, i le tauvaga fa’asolo o tusi mo fanau, ua fa’aigoaina, o Leo o Tupulaga Fa’ava-o-malo o le Lumana’i.

O Lupeoaunu’u Va’ai mai le A’oga Tulagalua a Sagata Maria, ua manumalo i le Tusipasi ‘Auro ma Fa’asalalauga Fa’ava-o-malo a’o le Tusi Siliva ua manumalo ai Alexandria Slaven o le A’oga Tulagalua le Vaiala Beach School.

O le manumalo ai o la’uĐ i nei fa’ailoga taualoa, ua vala’aulia ai fo’i e malaga atu e talia aloa’ia o la fa’ailoga ma ‘auai ai i le Fono a Tupulaga Laiti e faia i le nofoaga ‘autu o Malo ‘Aufa’atasi i Niu Ioka i le Aso Sa.

Peita’i, o le a le mafai ona malaga i la’ua ona e le’i lava se taimi na tu’uina mai e tapena ai ma sa’ilia ni fesoasoani tau-tupe mo lea fa’amoemoe.

Ae o le le-‘auai atu i Amerika, o le a taofia ai Lupe ma Alexia mai le fa’ailogaina ai i Samoa nei, o le taunu’uga manuia o a la taumafaiga.

Fa’atasi ma le lagolago a o la matua, o le a aga’i ai le to’alua lea i le Fuafuaga lona lua, o le fa’aaogaina lea o feso’ota’iga fa’atekonolosi o le Skype, e ‘auai ai i lea sauniga.

O le fa’ailoga - Le Tusipasi ‘Auro mo Lupe, sa fa’atatau i se tala na ia tusia e ta’ua “O le Leo o le Pasefika.”

O lana tala na tusi e uiga i se toa na va’ai iai, e igoa o Katalina mai Samoa.

“Sa taumafai Katalina e puipui ma fa’asao Samoa mai le tele o lapisi ma otaota sa salalau solo, o le fa’amatalaga lea a Lupe.

“O lana lea fesoasoani ia Samoa, o le faia o mea-nini’i fa’apea, e pei o le ta’alaoina o le lapisi ma le faia o se poloketi o togala’au-laiti i a’oga. Ona fa’asolo atu ai lea e ‘auai i le fa’alauiloaina fa’alaua’itele o lea fe’au i atunu’u mamao.”

Na fa’afetaia e le tama’ita’i 11 tausaga le fesoasoani a lana pulea’oga, o faia’oga ma ona matuam sa lagolago malosi ia te ia i taimi uma.

Mo le aga’i i luma, o lo’o naunau Lupe e fia avea o se loia mo le si’osi’omaga e fa’aauau ai lana finau e fa’atumauina le lanumeamata o mea uma i le si’osi’omaga. O Lupe o le alo o Tu’u’u Simeamativa ma Nonu Saleimoa Va’ai mai Si’umu ma Magiagi.

O le tama’ita’i o Alexia, ua matua fa’afiafiaina ina ua manumalo i le Fa’ailoga Siliva. O lona fiafia i nofoaga tu-matafaga na fa’aosofia ai e tusia se tala e ta’ua, “ O se fale mo le Ali’i o Pa’a”.

I lana tala, o lo’o fa’amatala ai e le tama’ita’i 10 tausaga, fa’afitauli o lo’o tutupu i nofoaga tu-matafaga, e aofia ai le si’isi’i o le tai, o le fa’alaloina o la’au e tagata, o le tafia o le palapala i nofoaga nei ma le ‘eliina o le oneone e tagata ma fa’atau atu ia maua ai tupe e fausia ai fale-tetele.

“O la’u tala, o le fa’amoemoe mo le lumana’i, pe fa’apei ona galulue fa’atasi o tagata ma meaola,” o le fa’aaliga lea a Alexia. “E le o afaina tatou o tagata-soifua i fa’afitauli nei peita’i, o meaola o lo’o matua a’afia ai tele.”

E mana’o Alexia e fia avea o se tasi e va’aia lelei le si’osi’omaga i le lumana’i.

O ona matua o Julie Julianne ma Leusoga Slaven mai Fasito’otai.

Na ia fa’afetaia ona matua, lana a’oga ma ona matua-fa’aleAgaga, le Faife’au o Siaosi ma Nu’u mo tatalo sa tu’uina atu mo ia.

O le tauvaga lenei, sa maua ai le avanoa o tusitala talavou mai le Pasefika, e fa’amatalaina ai a latou tala i mata’upu ‘ese’ese e uiga i Taunu’uga o Atina’e Fa’aauauina i o latou atunu’u.

Na fa’aalia e Tu’u’u Simeamativa, e fa’afetai ona ua iai le fiafiaga o fanau ma ua naunau fo’i tamaiti-a’oga e fia malamalama i fa’afitauli o fesuia’iga o le tau, a’o laiti.

“O fa’afitauli nei o lo’o tusi aga’i iai, e matua taua lava ma a tatou amata-mea e a’oa’o fanau a’o laiti, ‘ou te talitonu e iai le fa’amoemoe mo tatou i le lumana’i,” o le fa’aaliga lea a le tina.

“Avea lea tulaga o se fa’amalosi’Au mo tatou, e una’ia ai lo latou naunau e fa’aauau ai pea, ae tatou taumafai malosi e una’i ma fesoasoani atu i isi tamaiti.”

Na ta’ua e le tama o Alexia, e manaia tele tala mai teineiti aua o lea ua lagona o latou leo ae maise o fa’afitauli o lo’o feagai ma o latou auga-tupulaga.

O le a sa’ilia e le Komisi Fa’ava-omalo mo tusi a tamaiti, se fesoasoani e tusia ai ma fa’ailoa tala uma ae maise le fa’asalalauina o tala mai fanau, ma avea ai fo’i o se taumafaiga o tusiga-tala fa’aItulagi mo Motu o le Pasefika.