Matua faitioina le Malo

E talitonu le Minisita Fa’aolioli a le Vaega o le Tautua, mo le Matagaluega o Fa’amasinoga, o Lefau Harry Schuster, ua o’o i le taimi ua tatau ai ona fafo ma le ma’afala le malo lea.

Na saunoa Lefau, ua o’o i le taimi ua tatau ai ona o-‘ese le Palemia, Tuila’epa Sa’ilele Malielegaoi ma le pulega a le HRPP.

“Ua silia i le 30 tausaga o tula’i mai le HRPP i le foe, ma ua tatau i le atunu’u ona fesili ane, pe o le a se suiga lelei ua faia e le HRPP mo ia ma lona aiga”, o le fa’aaliga lea a Lefau ananafi.

Na ta’ua, o faiga a le malo o iai nei, ua nofo-‘aitalafu ai le atunu’u, ma e matua afaina ai tupulaga faimai o Samoa.

“E iai le tulaga le-manuia lea ua aliali mai i le malo lea e iai nei, o le a totogi e o tatou auga-tupulaga le ‘aitalafu lea ma e o’o lava i isi auga-tupulaga e fa e soso’o mai, o tau totogi lava le nonoga-tupe lea,” o lana fa’aaliga lea.

“’O se tulaga talafeagai le ‘aitalafu, ae ‘aitalafu e fua i le malosi e gafatia ona toe totogi.

“A’o iai i le soifuaga nei, e te taumafai e sa‘ili solo se tupe e amata ai se pisinisi ma i lou soifuaga-atoa, e te mana’o e tu’u mea uma na mo lau fanau e aunoa ma se ‘aitalafu.

“O la’u ‘auala lena i mea nei o polokiki: ia mautinoa o le ‘aitalafu ua e faia, ia mafai ona totogi i lau auga-tupulaga ma tu’ua ai loa ua mae’a.”

Na fa’aalia le finagalo lea o Lefau i se fa’atalanoaga ma le Samoa Observer ananafi. I lea taimi, na fa’amaonia ai fo’i e Lefau, o le a toe tauva i le faigapalota tele i le tausaga fou, mo le Vaega a le Tautua Samoa.

Mo le silasila i luma, na ta’ua e Lefau lona te’ena ai o lafoga ua fa’aopoopo e tau totogi ai ‘aitalafu.

“’Ou te le-fiafia i le si’iga o lafoga, a ‘ou te manatu i avanoa mo teugatupe-fa’aPisinisi,” o lana saunoaga lea.

“O le tele lava o pisinisi e iai, o le tele fo’i lena o lafoga e mafai ona aoina. A fa’atu sau pisinisi, o le mea mulimuli lava e te mo’omia, o le fa’aalu uma o au tupe e totogi ai lafoga, ae matua mo’omia le lelei ma mautu tupe e fa’agaioi ai le pisinisi.

“Ou te talia le faia o se si’osi’omaga manaia fa’apena e to’atele ai tagata e teu a latou tupe ma fa’aopoopo ai fo’i lafoga e aoina, nai lo le na o le fa’aopoopo o lafoga pei o le mea lea ua fai nei.”

E iai se va’aiga fou, va’aiga taula’i a Lefau ma lana Vaega, o le a manuia ai tagata Samoa uma.

“O lo’o matou fa’atu-atua se faiga ma se manatu fou. Matou te fou ma talavou; e iai fo’i tagata talenia ma atamamai.

“O le fa’apea mai o tagata e leai so matou iloa ma agava’a, atonu e leai se poto-masani e ta’ita’ia ai le malo ... ae... sa avea a’u o se fa’amasino ma o se loia fo’i. O Afualo e fa’apitoa lava i mea tau tupe ma le fuafuaina tatau. Ua matou naunau ia atina’e le atunu’u i lona tulaga aoao-tetele.”

Na ta’ua fo’i, o le atina’eina o pisinisi laiti, e taua tele mo le atina’eina o le atunu’u aoao.

“E le tatau ona tatou fa’alagolago i le ‘AufaiPisinisi tuma’oti ma tagata faigaluega. E tatau lava ona toe suia ma fa’afou le atina’e o le atunu’u. O le uiga o lea mea, o le saunia lea o se si’osi’omaga e mautinoa e talitonuina e o tatou tagata, e teuoloa ai ma atina’e ai a latou lava pisinisi.

“O le tulaga aupito faigata lea mo tagata Samoa, o fa’amaoniga mo nonoga-tupe. E leai ni o latou fanua-totino ma e tatau ona fai iai se fuafuaga i le fa’aletonu lena, o le leai o ni fanua e fa’amaonia ai nonoga-tupe.”

“A galulue fa’atasi ma le faletupu o atina’e, e lelei lena aua e mafai ona fesuisuia’i a latou mana’oga masani,” o lana fa’aaliga lea.

A toe filifilia, o lo’o fuafua ia fa’amautuina ni tulafono e fa’amalosia ai le atina’eina o pisinisi laiti.

“O le a taumafai e fa’amautuina ni tulafono e faigofie. E le o se tulaga e mo’omia ai se loia ma le tausi-tusi po’o se su’etusi fo’i e amata lau pisinisi.

“I tulaga o teuga-oloa, ‘ou te fia va’ai i ni fautuaga ma fa’atinoga a le malo mo ni mafaufauga lelei, pei o le tu’uina mai o le seleni amata pe 20 pasene ma fai se faiga e fa’atuai ai le toe-totogiina o ia vaega i se taimi ua sologa lelei ai se taumafaiga ma ua talafeagai ai ona totogi.”

E le’i mafai ona maua o se avanoa mo se finagalo mai le Ali’i Palemia ananafi, e uiga i lea mata’upu.