Tumau le finau a Palu i “tagata faatupu faalavelave”

Ua faamāmā-sagia e le ta’ita’i o le Itu Agai, Palusalue Faapo II, le Vaega Faa-Upufai e Puipuia Aia Tatau a Tagata (H.R.P.P.)ona o lo latou lē magafagafa lelei a’o to’esea le Palemia, Tuillaepa Sailele Malielegaoi.

Ua faamāmā-sagia e le ta’ita’i o le Itu Agai, Palusalue Faapo II, le Vaega Faa-Upufai e Puipuia Aia Tatau a Tagata (H.R.P.P.)ona o lo latou lē magafagafa lelei a’o to’esea le Palemia, Tuillaepa Sailele Malielegaoi.

O le Aso Tofi a’o tau maua se malosi o le Palemia mai se manu’a i lona vae, lea na tuuina atu o ia i le falema’i i le po o le Aso Lulu, sa faasino atu e Palusalue i totonu o le Palemene se mea na ia faamatalaina e foliga i le to’esea o se ata faataatia i le va o Minisita o le H.R.P.P.

“O le a le mea ua tupu i latou outou itu?”o le fesili lea a Palusalue.

“Ua taape solou outou, o le a le mea ua tupu?

Ua leai so outou ta’ita’i?”

O le tali atu lea a Palusalue i le sui Palemia o Fonotoe Pierre Lauofo, o ia lea na fai mai o le ta’ita’i o le itu agai ma sui o lana vaega ua “tusa pau lava ma tagata faatupu faalavelave.”

O lea feupua’iga na tula’i mai a’o faagasolo le faitauga lona lua o le Tulafono Tau Faaofi o le Tete’e Atu i Faiga Faatupu Faalavelave 2014, lea na faataatia i le laulau-a-fono a le Palemene e le Minisita o Leoleo ma Falepuipui, o Sala Fata Pinati. Sa faailoa atu e le Minisita i le Palemene e faapea e matua taua tele le Tulafono Tau Faaofi i le itu i tapenaga a Samoa e talimalo i le fono i taimi faai’u o lenei tausaga a Setete Tau Ati A’e o Atumotu Laiti.

“ E faapitoa le taua o le tulafono mo le puipuia o tagata e o mai mo le fono a le S.I.D.S.,” o lana faaaliga lea. Na tofia e le Palemia o Tuilaepa le Minisita o Sala e avea ma Ta’ita’ifono o le Komiti Tau le Puipuiga.

Sa faailoa atu foi e le Minisita i le Palemene e faapea o le Sui Komesina o Leoleo, Fauono Talalelei Tapu o se “ta’ita’i lelei: ma o se “toa”, faapea foi ma lona avea ma “Pule Aoao o Fuafuaga Uma”.

O le Aso Tofi na fai mai ai le Minisita o lona faamoemoe o le tufatufa atu lea o ata o le “fuafuaga tau le puiuiga” i Sui Usufono uma o le Palemene.

“Aisea?

O lo’u talitonuga o le Maota lenei o Samoa e tatau ona talanoa ai faalaua’itele mea.

E leai se mea e tatau ona natia, e tatau ona avatu uma i fafo i le malamalama ma le faamoemoe e faapea o le (puipuiga) o le galuega fai faatasi lea a tagata uma.

“O le mea lea ua ‘ou saunia ai se ata lea o le a ‘ou tuuina atu i Faipule uma ma Minisita o le Kapeneta ma le faamoemoe o le a outou silafia uma ai tapenaga a outou alo ma fanau ia ua matou tuuina atu i ai le faatuatuaga mo le faatinoina o le galuega.

”Talu mai le tausaga talu ai, fai mai Sala sa galulue le Komiti Tau le Puipuiga ma le Komiti a le “Interpol e aofia ai Ausetalia, Niu Sila ma Amerila e fefaasoaa’i o latou tomai e uiga i faiga o loo fuafua e fai.”

“Afai la tou te finagalo ou te faitauina atu mea uma (o i totonu o lenei lipoti), o lona uiga e o’o lava i le afiafia o tatou iinei, ae afai tou te finagalo ou te lauina atu na o sina vaega.”

O le taimi lea na faalava ai loa le sui Palemia o Fonotoe, ma fautuaina le Minisita e ‘aua ne’i faaalia nisi o auiliiliga tau le puipuiga.

“Afai o le mataupu tau le puipuiga e faasino i le S.I.D.S., e mafai ona e toe fesili tasi i lau Pule Aoao o Faatonuga pe talafeagai ona faailoa ai nei faamatalaga auiliili,?” o le faaaliga lea a Fonotoe.

“A pa’ia loa le mataupu tau puipuiga, (o isi mea) e lē tatau ona faailoa atu ina ne’i maua e tagata faatupu faalavelave lau lisi ona lē mafai lea ona e maua lau Pule Aoao o Faatonuga.”

Sa taumafai le Fofoga Fetalai o Laauli Leuatea Polataivao e faamanino le mataupu.

“Masalo o mana’o le Minisita e faalauiloa faalaua’itele a tatou polokalema mo le silafia e le atunuu ae mafai ona fesoasoani i ai le Palemene i le itu tau le puipuiga,” o lana faaaliga lea.

“Ae ou te iloa o loo taofi pea e le Minisita faamatalaga e lē faalaua’iteleina.”

Ina ua toe saunoa Sala, fai mai a ia: “Ou te manatu o le mea lea e fai mai ai le sui Palemia o tagata faatupu faalavelave ia o lo i totonu o le Maota.

“E leai ni tagata faatupu faalavelave o i totonu o le Maota. Mo se faata’ita’iga, o Levaopolo o se faatupu faalavelave?

O Leala o se ta’ita’i o tagata faatupu faalavelave? Poo Ifopo mai le Aiga i le Tai? O le tali e “leai”.

Fai mai le Miisita e leai ni faamatalaga faalilolilo o i totonu o le Tulafono Tau Faaofi ma ua na o faamatalaga uma lava e uiga i tapenaga mo le S.I.D.S.

Ona faaauau ai lea ma faailoa atu i le Palemene le aofai o i latou ua faamoemoe e auai mai i lea fono ma o le taimi lea na faauilavea ai loa Palusalue.

“Ou te alofa i le Minisita ona e foliga mai e le o iloa e le sui Palemia le faamoemoe o le Matagaluega,” o lana faaaliga lea, ma toe faailoa atu e lalolago e le Tautua Samoa Party le tulafono tau faaofi.

O le taimi lea ua amata ona lē fiafia Fonotoe. “Ou te matua malamalama lelei i le mea o loo taumafai le Minisita e fai,” o le tali lea a Fonotoe.

“O lea tatou te talanoa i le puiupuiga ma ua talafeagai lelei ma lenei tulafono tau faaofi.

O lea matou te talanoa atu i le puipuiga mai tagata faatupu faalavelave.

O le mea tonu lena o loo saunoa i ai le Minisita ma out e fautuaina o ia e faapea o loo i ai vaega e lē tatau ona faailoa atu faalaua’itele ia Palusalue ma le latou itu ina ne’i o latou iloa.”

Ona faatusa lea e Fonotoe Palusalue ma le Tautua Party i tagata faatupu faalavelave.

“E tusa pau lava latou ma tagata faatupu faalavelave. Matou te le loto ia iloa e i latou nei mea.

O mea nei e faatoa tatau ona faailoa atu pe a mae’a le fono.”

O lea faatusatusga sa lē talia lelei e Palusalue ma o le pogai lea na ia talosagaina ai le aveeseina o ia upu mai faamaumauga a le Palemene.

Fai mai le ta’ita’i o le Itu Agai o le faatusatusa a Fonotoe ua iloa ai lona “vaivai.” Ae sa lē ma taofia ai Fonotoe.

“Ana e faitau lelei i le tulafono tau faaofi,”o lana tali lea, “ma e tilotilo i le uiga o le upu terorisi, e lē faapito i tagata faapa-pomu.

“E aofia ai foi tagata e faatupuina faalavelave e ala i faaupuga e pei o le mea lea e te faia.

O le upu la ‘terorisi’ e lautele lona uiga ae o lea e te mafaufau lava na o mea o loo tatou vaaia i le Televise ma tala fou.

“E sa’o oe ona e leai ni au pomu ae mafai e tagata faatupu faalavelave ona faaaoga o latou mafaufauga ma ma fuafua e faato’ilalo le isi itu.

O na mea uma o gaoioiga faaterorisi.” Sa faaoloooloma’au le Fofoga Fetalai o Laauli ia Fonotoe ina ia ‘aua le faaaogaina le upu “terorisi” ae faaaoga le upu “turisi”.

Na tapā le Minisita o Sala e faaauau lana saunoaga.

“E tutusa uma lava tatou, Samoa mo Samoa,”o le faaaliga lea a Sala.

“O le pogai lena ua tonu ai ia te au e tatau ona faailoa atu ia te outou le mea o loo fai e le malo.

“Talu mai Tesema o le tausaga talu ai, sa aoao mai e le Komiti o le Puipuiga faamatalaga.

O loo matou galulue ma le Ofisa o le Tiute, Femalagaiga, SPA, S.S.C. Gataifale..Soifua Maloloina..,ma ua aofia ai tagata uma iinei,” o lana faaaliga lea ma ta’ua le tele o vaega sooupu a le malo e aofia ai le Pulega o Taulaga a Samoa ma le Faalapotopotoga o Vaa a Samoa. .

O le ta’ua o le Matagaluega o le Soifua Maloloina na faate’ia ai le Minisita o le Soifua Maloloina Dr. Leao Tuitama.

Fai mai a ia: “O le mea ou te mana‘o ia malamalama i ai le Maota e lē ona pau ia o gaoioiga a tagata faatupu faalavelave e ono lamatia ai soifua o tagata o loo i totonu o se faalapotopotoga e pei o lenei fonotaga.

“Ole isi faiga faa-terorisi o le aumai faalilolilo lea o faama’i ma le faamoemoe e pisia ai tagata o i totonu o se nofoaga faitele.

O se tasi lenei o vaega e tatau ona silasila i ai le Matagaluega.

“O nei ituaiga o tagata faatupu faalavelave e le popole i soo se mea; pau lava lo latou faamoemoe ia aumai se faama’i i se nofoaga faitele ina ia pisia ai tagata.

Sa auai foi le Minisita o Tupe, Faumuina Tiatia Liuga i le felafoa’iga.

Fai mai a ia o fuafuaga tau le puipuiga e eseese o latou tapulaa.

Na ia faailoa atu i le Palemene e i ai foi faatulagaga eseese o faamatalaga tau puipuiga e puipui malu ai tagata mai le ono osofa’ia.

Fai mai Faumuina o se vaega o lana galuega i aso ua mavae sa aofia ai le fuafuaina o fuafuaga tau le puipuiiga ma ofo atu e galulue ma le Minisita o Sala i le itu i lana fuafuaga tau le puipuiga.

Ae na toe tula’i Fonotoe ma faailoa atu e faapea ua faamaonia e Minisita e to’alua o le Soifua Maloloina ma Tupe le mataupu sa talanoa atu ai e uiga i fuaitau o faiga tau faatupu faalavelave.

“Ma o le ta’ita’i o le Itu Agai e gasegase ma o ia o le ta’ita’i o tagata faatupu faalavelave.”

E le’i toe faatali Palusalue. “Lau Afioga i le Sui Palemia, ua matuā e lē mafaufau na’ua,”o lana tali atu lea.

“E lē o a’u o se ta’ita’i o tagata faatupu faalavelave.

“O le isi mea, (ua tele na’ua leo i totonu o la outou pati) jo le a le mea ua tupu i la outou itu?

Ua outou alu faasoloatoa, o le a le mea ua tupu? Ua leai so outou ta’ita’i?”

E lē mafai lava ona taofia Fonotoe. “E lē o se lē mafaufau,” o lana faaaliga lea. Sa faailoa atu e le sui Palemia e faapea ua soli e Palusalue Tulafono Tumau a le Palemene ona ia le tagata e lē o mafaufau.

Sa taumafai le Fofoga Fetalai o Laauli e faato’ato’a le mataupu e ala i le una’ia o Palusalue ina ia ‘aua ne’i mamafa ia te ia le mataupu tau “terorisi”ma fai mai ua na o se mea ula lava.

Peita’i, sa aliali mai e le o talia e Palusalue.

O lea na ia fesiligia ai le Fofoga Fetalai e uiga i Tulafono Tumau ma fai atu e leai lava se mea o i ai e taofia ai soo se tagata mai le faauilavea pe afai o faamalamalama e se Minisita se tulafono tau faaofi.

E le’i talia e le Fofoga Fetalai o Laauli. Fai mai ai e sese Palusalue. I le amataga o lea aso, fai mai Sala o le puipuiga o se mataupu tele lea i le lalolagi i aso nei.

“E lē o po se lilo o loo tele faafitauli tau le puipuiga ua aliali mai,” o lana faaaliga lea.

“A tilotilo i le vaalele lea na leiloa (Vaalele Meleisia), ona tatou fesili lea pe o le a le pogai o le i ai o tagata faatupu faalavelave i le lalolagi, aisea e ave faamalosi ai e tagata vaalele, aisea latou t eave faa-gaoi ai tagata ma tāpā se taui tupe?

Aisea e taupulepule ai tagata (e fai se mea sese)?” Fai mai le Minisita o le Tulafono Tau Faaofi e Tete’e Atu a ii Faiga Faatupu Faalavelave 2014 ma le Tulafono Tau Faaofi o Tupe Tausi 2014 “o le galulue faatasi e taofi tagata mai le aumai o tupe eleelea i Samoa.”

Na te le’i ta’ua pe faapefea ona faatino lea tulaga. E uiga i le saogalemau lautele i totonu o Samoa, fai mai le ta’utinoga a le Minisita: “E mafai ona ‘ou fai atu e faapea i totonu o Samoa, e leai ni tagata faatupu faalavelave, e na o tagata lelei.

“Pau o le mea ua ‘ou iloa (e faapea i nisi taimi) j o loo faatau atu marijuana mo se fagu pia.

A maua le o loo faatauina atu, e falepuipui.” Ae ui o lea, na teena e le Minisita manatu e faapea e faatau e tagata marijuana ona ua matitiva.

“O la’u vaaia e faapea o se atunuu faamanuiaina lenei, o se atunuu e o tagata i lotu,” o lana faaaliga lea.

Ae i ai lava taimi “e lē sa’o ai le mafaufau o se tagata, ona tatou vaaia loa lea o mea e pei o le mea na tupu i Ulutogia.”

O le faalavelave i Ulutogia na aafia ai ni alii se to’aluaj ia na fasiotia i se agaese. “Ua matua tele na’ua mea leaga,” o le faaaliga lea a Sala.

“O le mea moni e faapea, e tofu lava le tagata ma lana tevolo, e o’o lava ia te a’u. E i ai taimi e faaosoosoina ai a’u aemaise ai lava pe a ‘ou lē fiafia ma o le taimi lena out e tautala ai i mea leaga”.

Na pasia le faitauga lona lua o le Tulafono Tau Faaofi e Tete’e Atu Ai i Faiga Faatupu Faalavelave 2014. E toe tauaofia taeao le Palemene.