Fesiligia vaega-tama i le S.V.S.G

Na fesiligia e se tamaitai galue ofo fua mai Ausetalia, Dr. Micaela Elphick, galuega fai a le To’omaga mo e Puapuagatia (S.V.S.G) i le vaetamaina o tamaiti.

Na fesiligia foi e Dr. Elphick, lea sa fa’aalu lona taimi i lea nofoaga, lea e mafai ona vaetama ai pepe. Ae le’i i ai Dr. Elphick i le nofoaga, fai mai sa ia talanoa atu i se isi foi tamaitai galue ofo fua, o lo’o faigaluega ai i lea nofoaga. Na ia fa’amatala lona le fiafia tele i le tulaga o lo’o i ai le nofoaga ma fai mai, e i ai taimi, e leai ai ni meaai, ma e fafaga nai pepe i le suati pe a leai ni apa-susu,” o Dr.Elphick lea. “E 24 itula e fai ai lea faiga.

Na ia fai mai, e tele lava ina leai ni napekini ma e mana’o o ia e fai ni siaki mo pepe ae peitai, e le faia lea tulaga. “Ae ina ua matou o’o atu ai i lea nofoaga, o le mea sa’o lava lea o lo’o tupu.” I le talanoa atu i le Samoa Observer, fai mai Dr. Elphick, ua ia o’o atu i lea tulaga ona e na te lagona, o lana matafaioi tonu lea o le lagā o lea fa’afitauli. “O le matuai le manuia lava, ao lea e latou te fa’alauiloaina mai mea lelei o lo’o latou faia,” o lana tala lea.

“Tilotilo i ai, ou te mautinoa o lo’o i ai tagata maualuluga ia o lo’o aofia ai i le faiga o ia tulaga fa’apea i le Victim Support.

“Ae o lea foi e i ai nisi fa’aletonu ogaoga.” Fai mai Dr. Elphick, ina ua fa’atoa ia asiasi atu i le nofoaga, na fai atu ai ia te ia ma isi o le au galulue ofo fua, e tatau ona feiloai atu i le Pelesitene o le SVSG, Lina Chang e uiga i lea fa’aletonu. “Ina ua matou o’o atu e va’ai ia(Lina), sa ia fai mai, e tatau ona matou malamalama, o le nofoaga e le o se galuega aloaia, o lona uiga e le o i ai se tupe fa’aagaga mo lea vaega i se tulaga e tatau ona i ai, ma o lona uiga, e le lava mea e fai ai pe fa’atino ai,” o Dr. Elphick lea. “Na ia matuai fa’amamafa mai lea tulaga.

Ou te le o mautinoa pe o se vaega o lena fa’amamafa, ona o lea ou te iloa, o lea e taumafai se tasi o le au galulue ofo fua, e fa’afeso’otai atu ia e ala atu i le i-meli e faitio atu i ai e uiga i le tulaga o lo’o tausia ai pepe i lea nofoaga.” Ina ua fesiligia mo se fa’amatalaga, na te’ena e le tamaitai o Chang, e na te le’i feiloai atu lava ia Dr. Elphick. I le te’ena o ia tu’uaiga, na ia fai mai foi e na te lei talanoa lava i le au galulue ofo fua. “E i ai le tagata lea e galue ofo fua o lo’o tausia i latou(pepe),” o le talanoa atu lea a le tamaitai o Chang i le Samoa Observer.

“O nisi tagata galue ofo fua, ia e o atu i tua, ae ou te le o va’ai i ai i a latou, e le o sa’u galuega lena.” I le vaiaso talu ai, na talosaga mai ai le tamaitai o Chang i le Samoa Observer ina ia tu’u atu se taimi i le SVSG e tali mai ai i ia tu’uaiga. Na ia ta’utino mai i se tali aloaia e tu’uina mai i le Aso Gafua, lea fa’atoa mavae atu. O lana tali i le fesiligi na tuuina atu ia te ia, o lo’o lomia atu i le itu tauagavale.

E tusa ai ma fa’amatalaga a Dr. Elphick, fai mai tamaitai o lo’o galulue i le nofoaga o se vaega o mafua’aga e le mafai ai ona latou maua ni napekini ma ni meaai i lea taimi, ona o lea e fa’atonutonu e le tamaitai o Chang sitepu uma o mea e tutupu. “Ma e le avanoa pe le mafai foi ona ia sainia ni siaki pe a latou manaomia,” o lana tala lea. “O lona uiga, e fai mai e fesili atu mo mea e mana’omia, ae e latou te fa’atali se’i saini e Lina siaki.”

Fai mai Dr. Elphick, o le mea muamua lava na ia mataua ina ua o’o atu i o, o le leai pea lava o ni vaega e mana’omia mo le nofoaga. “O lea na ou maua se feau tusitusia i la’u telefoni mai i le aso ananafi(aso o Ianuari 2014) mai i se tasi o le au faigaluega o lo’o i ai i o, talosaga mai pe mafai ona ona ou fa’atau atua ni apa susu ona e le lava apa susu e fafaga ai pepe,” o lana tala lea. “Ma o le mea masani lava lea.”

Na fa’aali atu e Dr. Elphick i le Samoa Observer lea feau tusitusia. E faitau fa’apea: “Micaela, fa’amolemole, o a’u, nani...fa’amalie atu ua ou fa’alavelave atu ia te outou, ae e mafai fa’amolemole ona tou fai atu ia Micaela, o lea e matuai ou mana’omia lava ni apa susu, susu i totonu o le pusa, ona e le o lava apa susu mo pepe.” Fai mai Dr. Elphick, e fa’atolu ona fafaga tamaiti i le aso. “O a latou aiga i le aoauli, e masani lava, o le alaisa ma si fasi saimini ma sina fasi a’ano manu fasi.

“Ou te iloa e maua a latou cereal i le taeao, o nisi taimi e maua ai a latou fuala’au aina mata i le aoauli, ae e mo’i lava, ae e le o se tulaga talafeagai lea o meaai mo se tamaititi o le matua lea.” Ina ua ia taunu’u atu, na matuai lagona lona le fiafia e uiga i le soifua maloloina o tamaiti o lo’o i ai i lea nofoaga. I le avea o ia ma se foma’i-manu, fai mai po’o le meaola po’o le tagata, e na te iloa lelei le tigaina o le ma’i pe a va’ai atu i ai.

“O se tasi tamaititi o lo’o iloa lelei le afaina o lona taliga ona o lea e tafe mai ai le alou i lona taliga,” o lana tala lea. “O se suavai sauna, o le avea o a’u ma fomai-manu, ou te iloa lelei le afaina pe a ou va’ai i ai pe o a’u o se fomai po’o se fomai-manu, ma o lea e matuai iloa lelei le tele o le sua sauna lea e tafe mai i fafo o lona taliga ma o lea e fa’ataio i le tiga. “Na i ai se aso na matuai leai ai lava se vai-fiva.

O se tasi o aso malolo a le malo, ia e leai ma se mea na mafai ona avatu i lea tamaititi.” Fai mai a ia, na ia alu i le aso na soso’o ai e fa’atau mai se vai-fiva, i le vave e gata ai lona mafai, ia mafai ai ona maua sina mapu seia o’o lava ina mafai ona ou avatu e va’ai se fomai.” O le fomai, o Leota Dr. Malaki Malaki. “O lona(Dr. Malaki) agalelei na sau ai e siaki ma tusi mai se tala-vai, ma togafiti ai le tamaititi,” o lana tala lea.

“Ina ua o’o atu Dr. Malaki i le nofoaga, na ia mataua e toeititi lava pepe uma e maua i le mageso.” Na fa’amaonia mai e Dr. Malaki ina ua fa’afeso’otai atu i ai mo se fa’amatalaga, lona va’ai i tamaiti. “E laiti tele i latou,” o lana saunoaga lea. “O nisi fa’atoa ta’i lima masina, o isi fa’atoa ta’i tasi tausaga, o lo’o i ai foi se pepe fa’atoa lua masina.

“Na fa’atasi lava ona ou o’o atu e va’ai pepe i lea nofoaga, o nisi e maua i le mageso, o nisi e afaina o latou taliga. “E tasi se tamaititi e ai se mea o lo’o fa’aletonu i lona tuasivi. Ia, ou te leiloa pe na siaki i latou, ae i le taimi na ou o’o atu ai i o e to’atele tamaiti na maua i le mageso ma fa’aletonu o latou taliga ma le fulu.

Fai mai Dr. Malaki, e na te leiloa pe na siaki nai nei tamaiti, ae le i o’o atu i ai lana asiasiga. O se tasi o tamaititi, ua le mafai ona saofai fa’alelei. “E mana’omia lava le va’ai o se fomai o tamaiti po’o se fomai o ponaivi,” o le tala lea o Dr. Malaki. E ese mai i fa’afitauli o le siaki fa’a-falemai, fai mai Dr. Malaki na fa’ateaia o ia i le tele o tamaiti e na o fasi ieie o lo’o lavalava ai. “E fa’alavalava pepe i fasi ieiei, ae le o ni napekini. Na o fasi ieie lava.

E i ai nisi e fai napekini, ae o le to’atele e na o fasi ieie lava. O le mea lena na ou va’ai i ai.” Na taua e Dr. Elphnick, mai i le tulaga na mafai ona ia aoao maia, e tele lava ni feuiuiaiga i le tala i le mea o lo’o tupu, ma i latou o lo’o gafa ma tulaga eseese o le tausia o tamaiti. Fai mai a ia, e to’alua ni tamaitai na galulue i le nofoaga, ma e eseese uma la tala na fai atu ia ia e uiga i le totogi o latou pe leai. “Ae peitai, na la fai mai ia au, e manino lelei o laua o tagata galulue ofo fua, e la te fa’ataeelea pepe pe a palapala, e la te fa’ainua vai falemai pe a maua ni vai, e la te fafagaina foi i latou.

“Ae e ma te sasaina foi pe a fa’alogotata- o le uiga o la’u tala, o aso uma i pepe ia, o le uiga o la’u tala, o latou uma i lalo o le lua tausaga, e sasa uma lava mo tulaga la ia e pei o le o tatala ie-fa’amalama e autilotilo ai i solo o lo’o i totonu o kapoti, po’o le fa’ataio i luga ona o le tiga o a’afiaga o latou taliga po’o tiga o nifo ua amata ona oso, e sasa ma toe ave tu’u i totonu o latou moega puipui.” Fai mai Dr. Elphick, e ese mai i ia tamaitai e to’alua, e i ai le au galulue ofo fua a le SVSG e galulue i po ma fa’aiuga o vaiaso. Na ia taua, na tu’uaia e le tamaitai galue ofo fua fa’apitoa, e leai ma se galuega a ia tamaitai o faia mo pepe.

“E leai ma ni galuega e latou te faia, e le fa’ainua vai a’o la e iloa e tatau ona fai, e latou te le suia napekini o nai pepe,” o Dr. Elphick lea. “Ia, a leaga auaga o pepe i le napekini, ma o lea na te’a uma i le vaiaso atoa ona o lea na i ai le au galulue ofo fua e fesoasoani i le suiga o napekini, e uma ane le fa’aiuga o le vaiaso ua toe maua ai foi, ona o lea na susu mai lava ma palapala i le fa’aiuga o le vaiaso.” Na fesiligia foi e Dr. Elphick le fa’a-tulafonoina o vaegā-tama o se vaega o galuega a le SVSG.

“O pepe uma nei, o lea e tausi mo le vaetamaina atu i fafo, ma ou te iloa o lou popolega lea e i ai, pe o se faiga fa’a-letulafono lena tulaga,” o lana tala lea. Fai mai a ia, e na te iloa, o so’o se ituaiga vaegā-tama lava i atunu’u i fafo, e matuai fa’amamafa lava i Samoa talu ai lava se fa’aletonu lea na a’afia ai se fa’alapotopotoga e fa’aautu i Amerika e igoa o le “Focus on Children”

“O lona uiga la i la’u matau atu i ai i le website a le To’omaga mo e Puapuagatia, o lea e fai mai o latou o se lala e gafa ma le fa’avaeina o feso’otaiga mai i aiga Samoa i tamaiti ia e vaetama atu i lalo o polokalame a le Focus on Children, o lona uiga, e manino lelei le i ai o lo latou so’otaga e ala atu i le Iunaite Setete i se isi itu po’o se isi tulaga fa’apena.,” o lana tala lea. “Ou te leiloa, pe ua aloaia lea nofoaga i o, e foliga mai e tele nai taumafaiga ia e tau fa’anana i lona tulaga ma mea uma e uiga i lea nofoaga.”

Fai mai Dr. Elphick ao ia iloa ai, o ia tamaiti o e na a’afia mai i sauaga ma faiga fa’a-mataifale, e foliga mai e matuai ogaoga lava ia tulaga ia te ia. “O se tasi o pepe na ave mo se vaegā-tama a Amerika, ao matou i ai i o- na avatu e se ulugali’i mai i Chicago,” o lana tala lea. “Ma o ia tonu lava lea na maua mai i se tama teine na fa’amalosia e le tama a lona tina (grandfather raping a granddaughter).

“O lena teneititi o lea e manino lelei sa nofo pea lava i le nofoaga, ma na i ai mo sina taimi ona e tatau ona lata i le lua tausaga o le pepe i le taimi na ave ai. O se tasi o le au galulue ofo fua na malaga fa’atasi atu ma tagata mai i le nofoaga e momoli atu le pepe, lea sa fa’aigoa ia Brett, i le ulugali’i, e le tau fesiligia le omai mai i le U.S. “E le’i va’ai muamua lava lea ulugali’i i le tamaititi ma e leai se taimi na tau fa’amasani ai. “E lei o’o mai lava lea ulugalii i le nofoaga e va’ai i le tamaititi ma iloa ai o ia, ae na avatu o ia i se faletalimalo ma tu’u atu i lima o tagata ese ma tu’uva’a ese atu ai ma lea ulugalii i se isi atunu’u.

“O lona uiga o le lalolagi atoa o lea tamaititi, ua matuai feua’i lava. O lona uiga, e tusa lava pe na aloaia atoa lea tulaga, ae e i ai fa’aletonu ogaoga o lea faiga.” Ina ua fesiligia mo se fa’amatalaga, na fa’amatala sa’o mai e le tamaitai o Chang lea mataupu o lo’o fesiligia. Ae peitai, na ia fai mai, o fa’amatalaga mai i le au galulue ofo fua, e le fa’avaea. “Ou te le’i talanoa i ni tagata galulue ofo fua, aemaise lava ou te lei talanoa i ni au galulue ofo fua i tulaga tau-vaetamaina,” o lana tala lea.

“O vaegā-tama o se mea e matou te le talanoa i ai ona e le o matou o se lala mo vaegā-tama ma o le mea lena o lea ou te mana’o e fa’amautinoa atu.” I le taimi o le fa’atalatalanoaga, na fa’amatala ai le tamaitai o Chang i se faifeau e suafa ia Ieremia, na ia vaetamaina se pepe. “E manaia pe a outou talanoa ia Ieremia pe afai e avanoa Ieremia ae le i malaga ese atu ai o ia,” o lana tala lea.