Faaali poo le Talanoa, fai mai ai Matai

O lea ua lu’i le Palemia o Tuilaepa Sa’ilele Malielegaoi ina ia faailoa mai le ulua’i lipoti a le Faletupe o le Atiina A’e o Asia (A.D.B.) i le atunuu lautele poo le talanoaina o le mataupu i luga o le Televise

O ia lu’itau na fai i le Aso Lua e ni matai iloga o nuu. O Fiu Mataese Elisara, o Sili, Leulua’ialii Tasi Malifa, o Afega, Telei’ai Dr. Sapa Saifaleupolu ma Lilomaiava Ken Lameta o Vaimoso ma Safotu.

O le Lipoti a le Faletupe o Asia e pei ona ta’ua o se taunuuga lea o ni fonotaga na fai i Samoa ma matai o nuu e uiga i le lisiina atu o eleele faale-aganuu mo ni taui tau tamaoaiga.

E ui lava ina faapea mai sa faavae i luga o feutanaiga ma nuu, ae sa faaulu lava e ia matai e to’afa se faaseā i le Ofisa o le Vaega e Faagaoioia Galuega Tetele Faapitoa i taimi faai’u o le 2013, fai mai ua na o se faasoa o taofi ae leai ni feutanaiga na faia.

Ae ui o lea o le vaiaso talu ai, i totonu o le Sunday Samoana, na teena ai e Tuilaepa lea mau, fai mai o le faasea e faapea e le’i faatinoina lea taualumaga tau feutanaiga , e sese.

“Ua uma ona fai feutanaiga ae o ia tagata o loo taumafai lava e ‘eli i luga, e le o malamalama,” o lana faaaliga lea. “Atonu o loo latou taumafai e faavevesi mea mo se fuafuaga faaletagata ina ia maua ai ni tupe.

Ae talitonu le matai o loo fai ma fofoga o lea vaega o Fiu, e le’i faitau le Palemia i le ulua’i lipoti a le A.D.B. ma o lea matou te aioi atu ai ia te ia ina ia faitau i lena lipoti.

“Matou te talosagaina le Palemia , faamolemole faitau le lipoti. E matua feteena’i lava ma le mea lea e fai mai ai. I le avea ma Faauluuluga o le Malo, e noatia o ia ina ia matua faitau lelei lea lipoti.”

Fai mai le Palemia o le faafitauli o aso nei e faapea “ua to’atele na’ua polofesa.”

Na ia toe ta’ua e faapea o lea vaega o matai, lea na faauluina lea faaseā i le A.D.B. e tusa ai ma le faaaogaina tau tamaoaiga o eleele faale-aganuu, e le fia malamalama i le taualumaga o le lisiina atu o eleele faale-aganuu.

Ae peitai, o loo tete’e pea Fiu fai mai e le o le mea sa’o lena.

“Matou te fia iloa lelei e faapea ua uma ona matou tauivi ma ‘ausia lea tulaga. Ua matou tauaveina lenei galuega na o i matou lava mo le lumana’i o tatou eleele faale-aganuu.

“Matou te aioi atu i le Palemia faamolemole faitau le lipoti!” Ae mo Tuilaepa ma lona ta’ua o i latou o polofesa, sa le ioeina e Fiu.

“Ua na o i matou lava o ni tagata faatauvaa ua notia atoatoa mo se faamoemoe-o le puipuia lea o le faaliliuina atu o matou eleele faaleaganuu O le polofesa o le Palemia lava lea.

O le Afioga a le Palemia Polofesa.

Ae o i matou, o nai tagatanuu faatauvaa o lenei atunuu, ma o i matou o matai.” Na ia una’ia le Palemia ma le faiga-malo ina ia mulimuli i fautuaga na fai e le O.S.P.F.

Afai e le tausisia fautuaga a le O.S.P.F., ona toe faauiese lea e le A.D.B tupe mo lea galuega.

“O se aso faanoanoa lea mo Samoa pe a latou taofi le tuuina mai o tupe.

Afai e fai e le malo le mea sa’o, o le a umi se taimi e aoga ai.

I le taimi nei, fai mai Fiu e le’i tausisia e Tuilaepa le feagaiga na fai ia Novema o le tausaga talu ai i le faagasologa o talanoaga Faalaua’itele ma le O.S.P.F. ina ia ‘aua nei talanoa i nusipepa e uiga i lea mataupu, se’ia vagana ai ua maua mai le lipoti.

“O se mea faatiga lea!. E ui ina o lea sa tatou tausisi ai ma leai se upu e fai, ae sa matua sa’oloto lava le Palemia ma talanoa i tagata Samoa ma osofa’i matou e ala i le taalo i le tagata.

E tatau ona matou faasa’oina lea faamatalaga mo tatou tagata faitau ma lo tatou atunuu.”

O le tausaga talu ai, sa suesueina ai i latou na faaseā e le (O.S.P.F.). O se otootoga o lea lipoti sa lomia faasalalau talu ai nei i luga o le website a le A.D.B., na una’ia ai le Malo ina ia auai i ni “feutanaiga taua” ma sui o tagata lautele e tusa ai ma lana fuafuaga ina ia siitua le aoga taua tamaoaiga o eleele faale-aganuu i le atunuu atoa.

O se lipoti na lomia talu ai nei i luga o le wesite a le A.D.B. na una’ia ai le malo ina ia mautinoa e faapea ua auai le atunuu ina ia atagia ai i lona taunuuga mana’oga o tagata, manatu faaalia, ma o latou faamoemoega.”

Sa faaauaupea lea lipoti ma fai mai “e le toatele ni tagata o le aufaipisinisi na faalogo pe na iloa lea galuega tele ma pe faapefea ona fesoasoani i le atiina a’e o le tamaoaiga o Samoa.” O le lipoti atoa a le A.D.B. e uiga i ana suesuega e le’i tuuina mai.