“E le’i mae’a”-Palemia o Tuilaepa

Ua teena e le Palemia, Tuilaepa Sa’ilele Malielegaoi, tuuaiga ua fulitua lana faiga-malo i mea na tutupu tau “faiga pi’opi’o” ia na faaalia manino e le Pule ma Su’etusi Sili o Fuimaono Camillo Afelē, i totonu o lana lipoti i le Palemene.

Ua teena e le Palemia, Tuilaepa Sa’ilele Malielegaoi, tuuaiga ua fulitua lana faiga-malo i mea na tutupu tau “faiga pi’opi’o” ia na faaalia manino e le Pule ma Su’etusi Sili o Fuimaono Camillo Afelē, i totonu o lana lipoti i le Palemene.

O ia mea na tutupu- e aofia ai tuuaiga e uiga i le faaaluina e se Minisita o le Kapeneta, Faumuina Tiatia Liuga, e ese mai isi lava mataupu-ia na su’esu’eina ma faamaonia e le Komiti a Alii Ofisa o le Palemene.

“O le talanoaina o lenei mataupu e le’i mae’a,” o le faaaliga lea a Tuilaepa i le Sunday Samoan i le faagasologa o se talanoaga i totonu o lona ofisa i le fale o le Malo i le Aso Faraile. “Ia manatua foi o le tuuina atu o le lipoti (a le Komiti a Alii Ofisa o le Palemene) na fai (i totonu o le Palemene).

Ona mae’a ai lea o le taualumaga ae sa faaalia manino lava e faapea a o’o ina toe tauaofia le (Palemene), o le a matou talanoaina loa.

“O le taualumaga e faapea a taunuu mai le lipoti, ona faataatia lea i luga o le laulau-a-fono.

O lea la na faataatia ai i le laulau-a-fono ma o Muagututagata na faataatiaina i luga o le laulau-a-fono, o lana faaaliga lea, ma ta’ua le Ta’ita’ifono o le Komiti a Alii Ofisa o le Palemene o Muagututagata Peter Ah Him.

“E le’i talanoaina e le’i talanoaina lava.” Sa faamaonia e Tuilaepa e faapea o le talanoaina o lea lipoti e tatau ona amata i le aso 18 o Mati 2014, pe a faatulaga le taimi e toe tauaofia ai le Palemene.

“Ae peita’i, e i ai lava taimi matou te faia ai taaloga ma le itu agai,” o lana faaaliga lea e pupuni ai se taua o upu felafoa’i talu ai nei i totonu o nusipepa i le va o vaega faa-upufai e uiga i le aliali mai o le leai o se mea ua fai e le malo e fo’ia ai mataupu na faaalia manino i totonu o lipoti.

“ E leai ma se aoga e tasi o ia upu. Ua te’a aso o Tupua ma Tofilau ia sa toetoe lava a pa’ilima ai. Ae o nei mea, e tatau ona matou taumafai e ataata.”

Fai mai Tuilaepa o le finau mai pea o le Taitai o le Itu Agai, o Palusalue Faapo II e faapea ua fulitua le malo i le ‘auga o le lipoti e sese.

“E itaita gofie Palu,” o lana faaaliga lea.

“E tasi le mea na ‘ou togi atua i ai ma na ‘ou vaaia ai lona ita tele ma o lea na ‘ou toe nofo ai i lalo ma ‘ou ataata.”

Na ataata foi Tuilaepa i tuuaiga talu ai nei a le Faipule o Siumu o Tu’u’u Anasii Leota, e faapea o ia ma isi sui auai o le Vaega e Puipuia Aia Tatau a Tagata (H.R.P.P) ua latou i ai i se tulaga e faavae ai se vaega faa-upufai fou ona o le faateleina pea o lo latou le fiafia i faiga a Faumuina.

Fai mai le Palemia o le lu’i a Tuuu ina ia ou “alu atu ma te fusu i lima e lua” e uiga ese foi lona malie. Fai mai Tuilaepa: “Ina ua fono la matou (H.R.P.P),fai mai Tuuu, ua na o sana mea ula.

Fai mai ua na o se meaula na ia faia e ta’ita’i sese ai nei tagata uma. O lea na ‘ou fai ai ia Tuuu, ana faapea e moni lau faaupuga, semanu ou te le popole i lena tulaga, ae fai se maea mo ni taamilosaga mo ni nai faatautu’i se tasi-lua ma oe.”

O loo taofi mau le Palemia e leai se mea o faaletonu i totonu o le H.R.P.P.

“O loo sologa lelei la matou pati,” o lana faaaliga lea.

Ae mo le lipoti a le Pule ma Su’etusi Sili, fai mai le Palemia o le faapea ua uma ona faataatia i le laulau-a-fono a le Palemene; suesueina e le O.P.C. ma o le a vave ona talanoaina e avea ma faailo ilo o le faaaogaina o faiga tau faiga-malo lelei. Ina ua fesiligia pe tumau pea lea tulaga pe a manatu i le tulaga e faapea ua faatuai le lipoti a le Pule ma Su’etusi Sili mo le tele o tausaga, lea e ono mafai ona faauigaina ua leai se faimea sa’o ma le mautali atu o le malo, ae sa teena e Tuilaepa.

“Leai, ona o lea e i ai le tulaga o le mautali atu,”o lana faaaliga lea. “O mea mai lea taimi o loo faamaumauina lava i le taimi nei. Pau lava le mataupu ona o lea ua tuai.”

Fai mai le Palemia “pau o le mea e mafai ona fai mai ai tagata o le leai o se mautali atu pe a leai se faiga e tagofia ai mataupu.” Fai mai Tuilaepa o loo faamanatu atu e le malo i taimi faifai pea Ofisa Sili uma o Pulega ina ia tuuina mai lipoti i le taimi e tatau ai ina ia talanoaina i le taimi nei.

“O le pogai lea ua fai ai taimi galue mo Ofisa Sili o Pulega ina ia tolu tausaga i le faafeagai ai ma le faiga tuai o le latou umia lea o ia tulaga se’ia o’o ina matu matutua lava,” o lana faaaliga lea.

“E i ai mafuaga i taimi uma e pogai ai ona lē faia isi mea ae talia lava ona e tatau lava ona fai lipoti ma tuuina mai.” Ina ua fesiligia e uiga i nai faaletonu tau tupe maua na faaalia i le lipoti a le Pule ma Su’etusi Sili, fai mai Tuilaepa o lea mataupu a malamalama gofie lava.

“Ia manatua na outou lolomi le lipoti lea na ita ai le Fofoga Fetalai,” o lana faaaliga lea.

“O le mataupu tau le fesuiaiga o tupe maua moni ma le tala o le tupe. Mo le malo ma soo se kamupani, e masani lava i taimi uma ona faata’oto le tala o le tupe faale-tausaga, ae o tupe maua moni i nisi taimi e faigata ona ‘ausia.

“O le faiga masani lena. O nei fuainumera ua na o ni valo’aga; e na o le Atua na te silafia le mea o le a tupu i le lumana’i. “O le mea lea, o tala faatatau uma o tupe, atonu e leai se malo e i ai sana tala faatatau paleni o tupe, e tumau lava ona i ai mea e tutupu.

E i ai taimi e ova ai ae lē mafai lava ona paleni atoatoa.

“O le mea lea, o le itu i tala faatatau o tupe a le malo, sa i ai se faafitauli tele i le 2009 ma le 2008, ona o le taimi lea na amata ai faafitauli tau tupe.

O le pogai lea na i ai se fuainumera telē i le tala faatatau o tupe sa lē mafai ona ‘ausia.”

O le taimi lea, fai mai Tuilaepa na talanoa ai ma le Minisita o Tupe i lena taimi o Papalii Niko Lee Hang.

“Sa ‘ou fai atu ia te ia, e lē tatau ona tuua’ia o ia, ona e lē mafua ona o ia.

“Ua e silafia i tupe faatatau o tupe ma le faatauina o tupe, afai e lē mafai ona e ‘ausia, ona ‘aua lea ne’i e ita ma tutuli latou...e lē o oe e pgai ai, ae ona o mafuaga mai fafo.

“O le tulaga lava lena i tausaga uma. E i ai le taimi e ova ai, e i ai foi le taimi e maulalo ai ae lē mafai lava ona paleni. E faapena foi kamupani, ou te le’i tau ane lava i se kamupani e selau pasene.”

E tusa ai ma lona poto masani, fai mai Tuilaepa e anoano mataupu o loo lagā i totonu o le lipoti a le Pule ma Su’etusi Sili ma le lipoti a Alii Ofisa o le Palemene o mataupu tuai. “I lo’u olana i totonu o polokiki, mai le amataga, o le tele o fesili o tatou feagai nei o fesili lava ia na lagā i le 1983,” o lana faaaliga lea.

“E ui lava i le tele o taimi e te taumafai ai e faamatala atu ia i latou, ae o ia mataupu e matua loloto.

“Mo se faataitaiga, o le tau o le soifuaga, o lea tulaga e pogai mai le tulafono o oloa ma mea e mana’omia. Ua tele na’ua taimi sa ‘ou taumafai ai e faamatala atu lenei tulaga, ae o lea out e vaai atu, e le o malamalama tagata.”

“Fai la ma faataitaiga le siitia o le aogā o le tupe....Sa ‘ou taumafai e faamalamalama lenei mataupu i le tele o taimi ae ua ‘ou iloa e leai se aoga e taumafai ai e faamatala manatu faavae e pei ona a’oa’oina ai matou i mataupu tau tamaoaiga.

O lea sa ‘ou taumafai ai e faamatala atu e ala i le faaaogaina o a tatou lava faiga faavae....ina ia mafai ai e tagata ona malamalama.

“Ou te le tio ia i latou, o se mataupu faigata.

“O le mea lea, a ou tautala i le inflation poo le siitia o le aogā o le tupu, ona ‘ou fai atu lea, silasila i aso e tele ai mea.

Tatou te iloa uma lava a tele oloa, o le a pa’u tau, ae a o’o i aso o le oge, ona felelei loa i luga o tau e pei o roketi.”

Fai mai Tuilaepa e masani ona ‘ata i le Minisita Faaolioli o Tupe a le Tautua Party, o Afualo Dr. Salele Wood.

“O ia e mai le Iunivesite, o lea ua na taumafai ai e faamatala faiga faavae masani e faavae i luga o tusi a’oga mo mataupu e pei o le mativa,” o lana faaaliga lea. “Ina ua mae’a ona ia faia lea faamatalaga ona o mai lea o tusitala o nusipepa ia te a’u.

Ona ‘ou fai atu lea ia i latou, a pa’ia loa lea mataupu, ua e vaai i se tagata o fealua’i lē lavalavā i le taulaga?”