Fa'ase'e e soalaupule le talosaga fa'asaga i le malo

O le tagi na fa’auluina e le sa avea talu ai ma Komesina o Leoleo, o Lilomaiava Fou Taioalo e fa’asaga i le Loia Sili o le Malo ma sui o le Komisi Su’esu’e na filifilia e le malo e faia lea su’esu’ega fa’apitoa, ua fa’ase’e atu nei i le Vaega e Soalaupule ma Fa’atalanoaina ai.

O le fa’ai’uga lea na faia e le Afioga a le Fa’amasino Sili, o Patu Tiava’asu’e Falefatu Sapolu ananafi.

O le amataga o le masina talu ai, na ulua’i fofoga ai i le Ofisa o Fa’amasinoga le mata’upu lea, ma toe tolopoina ai, mo se avanoa o i latou o tu’ua’ia, e tali i lea talosaga.

O lo’o molia e Lilomaiava le Loia Sili, o Aumua Ming Leung Wai, ma sui e le Komisi Su’esue e aofia ai le Taita’ifono o le Komisi, o Maiava Iulai Toma ma sui o Gatoloai Tili Afamasaga ma Su’a Tanielu.

O Lilomaiava ma se tasi o Komesina Lagolago sa va’aia le falepuipui, na fa’amalolo le-tumau mo le 12 masina a’o alo le Komisi Su’esu’e i sa’iliga o tu’ua’iga o le leaga o pulega ma faigapi’opi’o sa faia i le Falepuipui i Tafa’igata.

O le lona lua o su’esu’ega a le Komisi na latou fautuaina ai le Kapeneta, ua tatau ona fa’amuta le ‘au’aunaga a Lilomaiava.

I fa’amaumauga a le Fa’amasinoga, o lo’o fa’ailoa ai le mana’o o Lilomaiava, e fa’aleaogina le fa’ai’uga. O lo’o talosagaina fo’i se taui o le fa’aleagaina o lona suafa, e ala i le fa’amutaina lefa’atulafonoina o lana ‘au’aunaga, ma le fa’aleagaina o lona tagata.

I le Fale Fa’amasino ananafi, na saunoa ai Patu, e fa’ase’e atu le mata’upu, i le vaega e Soalaupule ai.

O Sefo ‘Ainu’u na fai ma sui o le Ofisa o le Loia Sili a’o Diana Roma mo Lilomaiava.