O le a manatua pea le malaga a Tasi

O se tama’ita’i-talavou e fiafia tele i lakapi, ua fa’amanuiaina fa’atasi ma lona tina, e malaga atu i Egelani i le Ipu a le Lalolagi, e lagolago le ‘Au a le Atunu’u i lana ta’aloga o soso’o nei ma Aferika i Saute.

O Tasi Grey, e 12 tausaga, o se tama-a’oga e lakapi fo’i, mai le A’oga a Ah Mu, na filifilia mai le se’i sa fa’agasolo a le Kamupani o le Land Rover mo le Ipu a le Lalolagi, sa faia lea e le Iuni Lakapi a Samoa.

O Tasi, lea o le a avea ma Va’aiga Aloa’ia o Ta’aloga (mascot), o le a ta’ita’ia le ‘Au i totonu o le malae fa’atasi ma le Kapeteni o Ofisa Treviranus, i le Aso To’ona’i nei i le Malae o Villa Park, i Birmingham.

A mae’a ona tiute ua fuafuaina, o le a alo lelei loa Tasi e matamata i le ta’aloga, fa’atasi ma lona tina, i le fale-matamata ma tapua’i lana ‘Au, le Manu Samoa.

Ua matua fiafia Tasi ma lona tina o Telesia Grey, ona o le a malaga mo aso e lima i Egelani ma ‘auai ai i le ta’amilosaga o le Ipu a le Lalolagi.

Ua aloalo nei Tasi e fai ma sui o Samoa i luma o le lalolagi, ma fa’aalia fo’i lona lagolagoina o lana Manu Samoa, na ola mai lava o fiafia iai.

“E le maua e tamaiti uma lenei avanoa,” o lana fa’aaliga lea. “O le a ‘ou matamata sa’o lava i lakapi ma tapua’i fo’i le tatou ‘Au a’o taumafai e ‘aumai i Samoa le Ipu.”

E talitonu si ona tina, o le a le-fa’agaloina le malaga lea ma e matua fa’afetaia ai le avanoa fa’a’Auro ua maua.

Ua fiafia fo’i ona o le a matamata-fua ai ma va’ai-tino mo le ulua’i taimi, i se ta’aloga lakapi.

E moni o Telesia o se tasi e fiafia i lakapi, ae fa’atoa maua lea o se avanoa e matamata tu’u-sa’ ai i le ‘Au a le atunu’u, ae le o se TV e pei ona masani ai.

Na fa’amanuia atu le Iuni Lakapi a Samoa ia Tasi ma Telesia i le la faigamalaga, ma o lo’o tapua’ia fo’i le va’aia o Tasi o ta’ita’i mai le Manu Samoa i le malae i le Aso Sa nei, 27 o Setema, 2005, i le 5.45 i le vaveao i Samoa, i le ta’aloga a le Manu ma le Springboks a Aferika i Saute.