E ono tofia se Samoa e ta’ita’ia le SPREP

O le vaiaso nei, e fa’amavae atu ai le Vaega o Polokalame mo le Si’osi’omaga o le Pasefika (SPREP), i le Fa’atonu Sili ua ono tausaga o tautua, le susuga a David Sheppard.

A’o tapena Sheppard - o se ali’i Ausetalia e tu’ua Samoa nei ma le tele o mea lelei sa faia i ona taimi a’o i Vailima, o le a fa’atalitali nei fo’i lea Vaega mo se Fa’atonu Sili fou e fa’auluulu iai Polokalame.

E fa’alagolago lea tulaga i se taunu’uga o feutaga’iga o lo’o faia i Apia nei i le aso, lea e ono avea ai lava se tagata Samoa e fai ma Fa’atonu Sili fou mo le fa’alapotopotoga fa’ava-omalo o lo’o fa’amautu nei i Vailima.

O le Sui Fa’atonu Sili, le Loia o Leota Kosi Latu, o se tasi o lo’o feta’ua’ina e ono maua le avanoa lea.

O le isi sui-tauva, o Dr. Netatua Pelesikoti, le Fa’atonu o le Vaega mo Suiga o le Tau a le fa’alapotopotoga. O ia o se tama’ita’i Tonga, ae iai fo’i le isi sui lona tolu mai le Vaega o atunu’u Melanesia.

I se fa’atalanoaga ma le Samoa Observer, na ta’ua ai e Sheppard, o le a manatua pea ona taimi i le SPREP, o se taimi aupito mata’ina ma aupito fiafia o lona olaga galue.

Moni o le a toe malaga atu, ae tumau pea lona agaga i Samoa ma le Itulagi nei o le Pasefika.

“O se taimi fa’agalo-gata le galue ai i le SPREP,” o lana fa’aaliga lea. “Sa iai lava nai ‘ausiga iloga na faia i tausaga ua tuana’i ae maise lava le fesoasoani lea i le Itulagi mo le fa’aleleia o le tali atu ma fa’amasani i suiga o le tau, o le va’aia ma le pulea lelei o otaota ma vaila’au ma le anoanoa’i o ola-‘ese’ese fa’aleNatura o iai.”

Mo Sheppard, o se tasi o vaega mata’ina o lona taimi, o le mafai lea ona galulue fa’atasi o le SPREP ma lagolagoina e atunu’u ‘auai uma, mo le faia o se suiga tele mo le puipuia o le si’osi’omaga.

O fesuia’iga o le tau, e pei ona ia ta’ua, e mautinoa lava, o le lu’itau ogaoga lea i le taimi nei.

“O nisi o lu’itau nei e aofia ai a’afiaga ua feagai nei ma le motu o Tuvalu, ona o le maualuga o le si’itia o le suavai ua iai,” o lana saunoaga lea. “O fa’afitauli ogaoga ia ma aupito faigata ona fo’ia, peita’i o le tu’ufa’atasia o puna’oa ma fa’amanuiaga ‘ese’ese mo le fo’ia o ia fa’afitauli, o le fa’amoemoe ‘autu lava lea o la matou galuega.

“O le ‘auala e fofo ai fa’afitauli nei, o le galulue fa’atasi ma faiga-fa’aPa’aga mautu ma fa’alapotopotoga ‘ese’ese, o vaega ‘ese’ese fa’aItulagi, o malo ma tagata uma o isi atunu’u. A tutufa’atasi, e mafai lava ona fai o se suiga.”

Mo Samoa lava ia, o nisi o fa’afitauli na ta’ua e Sheppard, o le si’isi’i pea lea i luga o le mafanafana o le sami, lea e tele ina afaina ai ‘amu o le sami.

Ae o lo’o mafai lava ona galulue fa’atasi le SPREP ma le Matagaluega o Puna’oa Fa’aleNatura ma le Si’osi’omaga, le Vaega Va’ai-Tau ma isi pa’aga ‘autu, mo le faia o se suiga.

“Lea ua tatou va’aia, le lelei o le galulue fa’atasi ma felagolagoma’i a le SPREP ma Samoa.”

Na fesiligia lana susuga I ana fuafuaga pe a mae’a o lana konekarate ae saunoa, o lo’o naunau e ifo’i atu i Ausetalia mo se malologa ua leva o fa’ananau iai.

“I le taimi nei, o le a tilotilo solo mo se isi avanoa faigaluega ae o lo’o tumau pea lo’u fa’ananau i le Itulagi nei ma Samoa. ‘Ou te mana’o lava e toe sau.”