O le si’itaga o totogi o se mea ula, o se fa’atiga-ulu

O le si’itaga a le malo i totogi lautele e tolu pasene, lea e fa’amamaluina i le vaiaso nei, o se fa’atiga ulu.

O le mea moni lava ia, na fa’amatala e le taitai o le Vaega Fa’aupufai a le Tautua, Palusalue Fa’apo II lea si’itaga o se taufa’ase’e, ma se mea ula.

O le si’itaga o totogi na fa’asalalau e le Minisita o Tupe, Faumuina Tiatia Liuga, ina ua fa’ata’atia i le laulau-a-fono lana tala fa’aopoopo o le tupe 2013-2014. Na fa’ailoa i luma o le Palemene, e $2.7 miliona o le $14 miliona tala o le tupe, ua fa’ata’atia mai mo le si’itaga o totogi lautele i tagata faigaluega a le malo.

“O le si’itaga mulimuli o totogi, na faia i le silia ma le lima tausaga ua alu, ma o le fetu’utu’unaiga ua leva ona tatau ona faia,” o Faumuina lea i le Palemene. Na taua e Faumuina, o le toe fetu’utu’unaiga lea na faia mo le si’itaga o totogi lautele, na mata’itu ai ni vaega autu e aofia ai le tau o le soifuaga, o le alu i luga o tau o oloa fa’apea foi ma totogi le talafeagai ma le fa’atauina o le malosiaga o tagata taito’atasi ma aiga.

Ae peitai, na ‘ata fa’amaela Palusalue i lea si’itaga i le taimi o se fa’atalatalanoaga ma le Sunday Samoan, i lona aiga i le aso ananafi. Na taua e le Sui Faipule o Safata, o lona popolega, ao fa’aailoa mai e le Su’etusi Sili ma fa’amaonia mai e le Komiti Filifilia a le Palemene “faiga pi’opi’o” i totonu o le faigamalo, e i’u ina pagatia ai tagata faigaluega a le malo, ia e maualalo o latou totogi.

“E tau fa’avalea tele lea faiga i tagata,” o Palusalue lea. “O se le migao, ma o se mea ula, ona o le 3% o le $10,000-$20,000 o lo’o tele ina maua e tagata faigaluega o le atunu’u i le tausaga? “E leai ma se uiga- e $300 i le tausaga, a tu’u la i le ta’i lua vaiaso, o lona uiga e na o le $2 e fa’aopoopo i o latou totogi ia e i ai.” Na taua e Palusalue, “o se le mafaufau ma se tau fa’avalea i le atunu’u ona e na o tagata faigaluega e tetele totogi o le a manuia ai i lea si’itaga.” O le uiga o lea mea, o tagata ia e tausima’i, ma faiaoga, o le a na o le $2 i le lua vaiaso, “o le matuai leai lava ma se uiga, leai se mea.

“O lea si’itaga o le ata moni lava lea, e na o Sui o le Palemene, Minisita, Ofisa Sili o Pulega, ma Pule Sili Lagolago, e manuia mai ai i lea 3%.” “O le a le ‘alofaga a le malo mo lea mea?” o le fesili tau fa’alili mai lea a Palusalue.

“E leai se tupe, ae aisea ua leai ai se tupe? “Ua uma ona fa’amaumau i faiga fa’api’opi’o e pei o ia mea na tutupu mai i le S.L.C.” o lana tala lea e fa’asino i se lē mafai e le Fa’alapotopotoga o Eleele o Samoa ona ausia le $11 miliona i tupe maua. “Ia, ae mafai foi ona aoga i se auala lelei e pei o le tu’uina atu i faiaoga ma tausimai o ni si’itaga lelei o totogi.”

O le tau atoa o si’itaga o totogi mo faiaoga, mo se fa’ataitaiga, e $318,000, o lana tala lea. E le tau masalomia e Palusalue, o le tau o le soifuaga o le a vave ona si’itia, ma faigata ai le olaga o ia tagata nai lo le olaga lea ua i ai.

“Ana fa’apea lava e le o i ai le malo i ni faiga fa’apiopio e pei ona fa’ailoa e le suetusi sili ma fa’amaonia mai e le komiti filifilia a le palemene, ua lava lea ma totoe e fa’amaonia ai le moni o si’itaga o nei totogi.”

E tusa ai ma le Minisita o Tupe, e $318,000 o le a fa’ata’atia mai mo si’itaga o totogi o faiaoga. “O totogi o faiaoga, na fa’amaonia i le 2010,” o lana tala lea.

“Ae o le lē lava o tupe na toe tu’u atu ai i tua lea fuafuaga. “Ao lea ua mautu le tala o le tupe, o le a toe fetu’utu’unai totogi o faiaoga i so’o se taimi lava e tu’uina mai, pe a pasia le Tala fa’aopoopo o le Tupe.”

O le isi $230,000 o le a avanoa foi e fa’atupe ai ni avanoa faigaluega mo le Matagaluega o Aoga. O le 5,337 na fa’afaigaluega e le malo e tusa ai ma fa’amaumauga a le Matagluega o Fuainumera Fa’amaumauina 2011, e 2181 e faigaluega mo le Matagaluega o Aoga, Ta’aloga ma Aganu’u. O le a aofia ai foi i lea si’itaga le 9,500 o tagata penisiona e mauaina le $130 i le masina.