Fuimaono Papali'i - Tausiga Samoa i le pogisa

I lenei tausaga e to’atasi lava le tagata ua na faaalia ia Samoa pe faapefea e se tagata tulaga maualuga ona fai a latou galuega ina ia faaleleia atili ai lo tatou atunuu-e ui lava ina lamatia ai o latou tulaga ma taunuuga e ono feagai ma i latou i le faatinoina o lea galuega.

Ona o lenei mafuaga, ua tonu ai i le Samoa Observer ina ia tuuina atu le faaaloalo ia Fuimaono Papalii C.G. Afele e ala i le faaigoaina o ia o la matou Tagata o le Tausaga. Ina ua mae’a ona faau’u mai le Otago University i Niu Sila i le 1995 ma se faailoga “Bachelor of Commerce, ae faapito lona tomai i Mataupu Tau Tausi-tusi, sa galue loa o ia i le 1996 i le Ofisa Su’etusi a Samoa (SAO).

O loo galue ai pea o ia i lea Ofisa talu mai lena taimi ma faasolosolo ai lava i le faagasologa o tulaga se’ia o’o ina ‘ausia e ia le tulaga o le Pule ma Su’etusi Sili a Samoa. I le faagasologa o lona taimi na silasila Fuimaono i se suiga tele faatasi ai ma toe teuteuga i le Faavae o Samoa ina ia mautinoa ai le faimea tonu, paleni ma le lē faa-itu’au o lana tautua i le atunuu.

O le tausaga talu ai na toe teuteu ai e le Malo le Faavae ina ia tuuina atu ai i le Pule ma Su’etusi Sili se suafa fou faatasi ai ma se vaitaimi umi e galue ai. Talu ai ona o le Su’etusi Sili o le a faaigoaina o le “Pule ma Su’etusi Aoao. “o lona taimi e galue ai o le a faaopoopoina mai le tolu i le 12 tausaga.

O ia suiga o loo faaalia manino i totonu o le Tulafono Tau Faaofi o le Teuteuga o le Faavae (Nu.2) 2012 ma ua fuafua e puipui ai le Su’etusi Sili mai le aiaina e le malo i le itu i tiute ma paoa o le Su’etusi Sili e su’e ai faasu’etusi tupe a le malo. . Sa faaaoga e Fuimaono lenei suiga e mautinoa ai le mafai e ia ma lana aufaigaluega ona “tauaveina i latou e tusa ai ma lo latou tomai faapitoa, faamaoni ma ia tausisia ai le tulafono i taimi uma.

“O le Tulafono Tau Galuega a le Malo ma tulafono faatonutonu e faasino i ai e mana’omia ai tagata faigaluega o le malo ina ia tausisia itu faatauaina nei-faamaoni, lĐ faa-itu’au, auauna, faaaloalo, faimea tonu, mautali atu, galue lelei ma le faamaoni,”o le faaupuga lenei o le imeli a le Ofisa Su’etusi a Samoa. “Ia matua tausisia e le Aufaigaluega a le Ofisa Su’etusi nei ta’iala ma itu faatauaina ma ua i ai le faamoemoe ia lĐ gata ina faamalieina e lea aufaigaluega ia tulaga ma ia sili atu pe a tuuina atu le auaunaga ia tatou paaga uma.”

O loo ta’ua e Iutisone Salevao i totonu o lana tusi e igoa o le Rule of Law, Legitimate Government & Development in the Pacific o loo ta’ua ai le tulaga-tofi o le Pule ma Su’etusi Sili e avea ma ma’a tulimanu o le faiga a Samoa e siaki ai ma faa-paleni ni mea.

“O se ta’ifau leoleo a le Palemene e galue e pei o se faiga taua e siaki aim ea i le faafeagai ai ma faiga pi’opi’o tau tupe ma lape o le malo,”o lana faaaliga lea. E ala i lana lipoti o le 2010 i le Fono Aoao Faitulafono, ua faamaonia ai e Fuimaono i tagata o Samoa ina ia faapena ona fai. O se alii ua na faailoa atu le mea na ia vaaia e ala i ana taumafaiga ina ia faatino se suiga mo le lelei o Samoa.

O se tamalii o loo tausi i nei faiga taua e ala i le faatinoina o lana galuega. Ina ua faata’oto le matafaioi a le Pule ma Suetusi Sili i totonu o le Faavae i le 1960, o le faamoemoe ia tofia se tagata e to’atasi i le avanoa se’ia o’o ina aulia e lea tagata le 60 tausaga o lona soifua faatasi ai ma se aiaiga faa-tuutuuga e faapea e mafai e le palemene ona faaopoopo lona taimi galue e ala i se iugafono.

“O le sini autu ia puipuia le tulaga tuto’atasi o le pule ma su’etusi sili e ala i le puipuia malu o lona tulaga,” o le tusi lea a Mr. Salevao. Sa ta’ua e Mr. Salevao le Fono Faavae a Samoa i Sisifo i le 1960 Vol II lea o loo faaalia ai e faapea i le faatinoina o latou tiute i lalo o le Mataupu 99, e tatau ona matua sa’oloto atoatoa le Pule ma Su’etusi Sili e faatino lava galuega e ala i le faailoa atu o soo se tulaga faaletonu tusa lava pe o fea na tupu ai ma pe o le a lava le inosia o ia e nisi o tagata.

“O le faatinoina o lea tulaga o lona tiute lea ma lana aia tatau e faailoa atu ai i le Fono Aoao Faitulafono i se taimi vave e ono mafai ai nei tulaga faaletonu ae le faatali se’ia o’o i le taimi o lana lipoti faale-tausga,” o le tusi lea a Mr. Salevao.

“O nei aiaiga faale-faavae pe a tuufaatasi ua avea ai le Su’etusi Sili ma ta’ifau leoleo a le Palemene e ala i le vaaiga o le faaaogaina o tupe a le malo ma meatotino ma lipotia loa lava- e aunoa ma le popole i le mea e tupu mai ai-e uiga soo se mea faaletonu pe a tulai mai.”

E aliali e le gata ina sa faitau e Fuimaono lenei lava pepa, ae na ia faia foi se isi laasaga ma faaaoga lona taua i lana galuega i aso uma. I le faagasologa atoa o lona taimi i le Ofisa Su’etusi, ua le gata ina sailia e Fuimaono le faatinoina lelei o lana galuega, ae sa galue ma le tiga i taimi uma ma taumafai ia lelei ona fai.

O le 2007 na faau’u ai o ia mai le Monash University i Ausetalia faatasi ai ma tikeri o le Master of Public Policy and Management, ona faaauai ai lava lea o lana a’oga mo se tausaga lona lua mo le Tikeri o le Bachelor of Laws i le Iunivesite o le Pasefika i Saute.

E fesootai o ia e ala i galuega tau le tomai faapitoa ma o se sui auai o le Faalapotopotoga Tau Tusi a Samoa, Sui o Tausitusi Faamaonia a Niu Sila ma o le Sui Auai o le Faalapotopotoga o Pulega a Niu Sila. O ia o se sui auai o le Polynesian Supreme Audi Institution in Governing.

O Fuimaono e i le Board of the Pacific Association of Supreme Audit Institution (PASA) ma o se Tagata Faau’u o le International Auditor Fellowship Program lea e i lalo o le United States Government Accountability Office.

O ia o se ta’ita’i e tuuina atu auaunaga tuto’atasi tau le su’eina o tusi ma una’ia le siitia o tulaga faaleleia i pulega lautele a le malo. E le gata ina galue o ia ina ia “mautinoa le tulaga mamalu tau tupe o faiga faa-Palemene o le Malo e pei ona mana’omia e o tatou Tiute ma le Pule Faale-Faavae”, ae fai mai le imeli a le SAO, na ia faia lea tulaga ina ia “tuuina atu ai ni auaunaga tutoatasi ma talafeagai ma le tomai faapitoa i vaega uma o faalapotopotoga a le malo i Samoa ma lipoti atu mea e maua i ana sailiga.”

Ua faaigoaina Fuimaono o la matou Tagata o le Tausaga talu ai lona faatinoina lelei o lana galuega ina ia mafai ai e isi o loo tautuaina Samoa ona faatinoina lelei a latou galuega.